胡楓將拍《小生去旅行3》　Joe Junior疑被飛：或者冇我份

無綫旅遊節目《小生去旅行》系列，2013年版由胡楓、謝賢及Joe Junior的三個小生主持，雖然幾位小生實際年齡全是爺爺輩，但修哥、四哥經常互窒，竟然產生化學反應，笑到碌地，由於口碑不俗，在2015年加入曾江，開拍《四個小生去旅行》，但當時卻鬧出了小風波，有指曾江在遊莫斯科期間，意外受傷要坐輪椅拍攝，四哥卻有感對方「扮嘢」，其後更在宣傳記招上發生掌摑事件，究竟四哥跟曾江真的不和，還是節目宣傳技倆，至今仍是一個謎。

近日修哥稱會再開拍《小生去旅行》，但卻避談是三個小生還是四個小生，無綫似乎有意更換主持。修哥接受《香港01》記者訪問，被問到開拍《小生去旅行3》，他表示：「係有咁嘅意思，但小生係邊一位？佢哋又度緊，大家啲期要就，暫時仲未知邊個得。」兩輯《小生去旅行》，共去了土耳其、西班牙、葡萄牙及莫斯科等多個地方，那麼再開拍節目，修哥又有否心水之選？他說：「去邊都無所謂，最緊要風景靚，聽聞東歐風景都幾靚。(你可以建議製作部門？)咁又唔使，我都係最緊要有得玩啫。」

自從節目記招發生掌摑事件，四哥及曾江恐怕再難合作？修哥笑說：「你以為佢哋好唔愉快咩？哈哈哈。」但卻未有回應四哥及曾江會否加入拍攝。有網民提議可加入劉江及周驄，頂替四哥及曾江，修哥表示：「在我嚟講，同邊個一齊都咁開心嘅，不過我諗周驄就唔會去㗎啦。(因為拍攝好辛苦？) 唔辛苦，真情係豪華旅行團，大家都唔知幾舒服。周驄呢佢要顧住太太嘅，佢去嘅成份都唔係咁高，佢好錫太太嘅。至於劉江？睇吓公司點安排啦。」

另外在節目中，年紀最輕只有69歲的Joe Junior，經常處於下靶位，被幾位老大哥「蝦」，被問到會否接拍《小生去旅行3》？他表示：「我未收到通知喎。其實拍嘅時候一啲都唔辛苦，好好玩，好開心嘅，同嗰幾位哥哥一齊，可以話領教到好多經驗、笑話，佢哋啲故事係好好聽嘅。同埋我梗係鍾意拍啦，但好多嘢唔係我話事㗎嘛，順其自然啦。」

節目中修哥是鐵膽，而Joe Junior跟修哥亦最啱key，他表示：「四個小生去旅行呢，我就同修哥最friend嘅，成日見到，因為我哋都係無綫㗎嘛。」修哥有否提起開拍節目？「最近白花油90周年都有請我哋去食飯，佢坐我隔籬㗎，佢都冇同我提過，或者今次冇我份？因為有咁多好嘅小生，咁多叻人。」上次四哥跟曾江發生不愉快事件，是否因而要換人呢？「呢樣我就唔知咁多，件事就發生咗。係我心裡面，永遠都係以和為貴，凡事有商量，唔啱傾到啱，一齊去睇呢個世界、去開心。」Joe Junior表示上次拍攝預早幾個月通知他，「如果修哥知道，我仲未知，可能我冇份呢？不過我去唔去都咁開心，最緊要tvb呢個節目多啲人睇。」其實節目還在籌備之中，或者工作人員仍未趕及通知Joe Junior，始終原班人馬最有火花。