人妻譚凱琪拍親熱戲事前無需向老公申請：係咁咦講聲

人妻譚凱琪（Zoie）今日（20/4）現身電視城出席無綫劇集《廉政行動2022》宣傳造勢活動。Zoie表示：「我都好耐冇出嚟見人喇，起碼成個月都冇出過街，係因為而家屋企有小朋友，我係會特別擔心。（有冇出現抗疫疲勞？）如果唔出街還好。但如果要帶佢出街嘅話，就要帶齊晒佢嘅嘢之餘，就要帶埋啲防疫用品，其實都幾大陣仗，咁所以都會有啲攰。」

被問到拍親戲是否需要事先向老公申請？Zoie笑言：「其實我同老公都一齊咗成十年嘅時間，而佢亦都習慣咗我嘅工作性質，初初嘅時候都會同佢交待清楚，咁但係而家就會係咁咦講聲囉，哈哈！就唔會話得定唔得，就唔會咁樣喇。因為佢都好相信我嘅為人，亦都好相信公司過份都有限囉。（有性感尺度底線？）都會有嘅。就好似啱啱我生完嘅時候，我著咗吊帶衫，我都會好唔自在，可能會覺得始終做咗媽咪有咗個身份，咁所以係會有呢個諗法。」