【迷】情人節簡淑兒冇人約　女神孤伶伶 ：其實自己一個更開心

由《愛．回家之八時入席》Elsa開始，有簡淑兒出現，基本上要按定cap圖掣，昨日她在新劇《迷》出現，雖然戲份不多，不過在討論區依然佈滿她的cap圖，劇情膠不膠？田蕊妮、鄭嘉穎做得好不好已是其次。對宅男來說簡淑兒就是一切。

其實簡淑兒初時都好擔心自己角色不討好，尤其演繹高中生，她接受《香港01》訪問時說：「我就27歲，但就要演個17歲嘅高中生，其實都驚網友話我太老呀，唔似呀咁，但好彩佢哋都好鍚我，冇咩點話我，我拍嗰陣盡量淡妝，又着多啲細路仔嘅衫囉，希望接近啲。我今次慘淡收場㗎，我今次嗰角色會越嚟越乞人憎，仲會有幾場戲同阿田互摑㗎，死啦，我都驚啲網友唔鍾意我……」儍啦，曾經有網友覺得簡淑兒的笑容可以令世界停止，就算妳在劇中殺人放火，他們都一定覺得你係被迫。

更令宅男開心的是簡淑兒今年情人節都係單身，重點來了，她說：「其實我𠵱家病咗，扁桃腺發炎，（咁男朋友要上嚟煮嘢畀妳？）哈哈….冇男朋友呀，今日自己喺屋企食自己，有我細妹喺美國返咗嚟，我同佢一齊過情人節囉，我一陣都要睇醫生。其實我上年都要做嘢，我仲記得自己買麥當勞返嚟食，我又唔覺得慘喎，我覺得如果揀咗個唔啱嘅人，其實自己一個更開心，我之前拍拖都試過節日前嗌交，之前試過滿心歡喜準備哂，點知節日前嗌交，好似係佢出去玩又講大話囉，唔記得喇，所以𠵱家一個人過情人節都冇咩唔開心。」宅男們是不是人生充滿了希望呢？