《巾幗3》刪強姦戲、《新紮師兄》播續集　網民估：促銷收費電視

無綫在深宵時段，重播經典劇集《新紮師兄》續集，無錯，係續集，不少網民都有疑問，為何不是由第一輯開始播映呢？有網民就陰謀論話，講到尾都是想賺錢，要觀眾幫襯myTV SUPER，無綫除了打開口牌硬宣傳外，其實已經有層出不窮的招數力推myTV SUPER，若然觀眾不肯就範乖乖付款使用服務，惟有睇倉底劇、膠劇，或者索性關機早點瞓啦。

以往的黃金時段，無綫必定用重頭劇壓陣，最緊要有高收視，但自從亞視執笠、ViuTV又未成氣候，無綫隨即轉了玩法，黃金檔竟然播放兩年前，馬國明擔正的倉底劇《流氓皇帝》，不但令馬國明成為炮灰，在頒獎禮食白果，更令觀眾焗睇膠劇，若然要睇無綫較為優質的劇集，還有其他選擇，就是俾錢睇myTV SUPER，或者自己上網追韓劇美劇啦。

若然觀眾不介意睇倉底劇，正在熱播中的《巾幗梟雄之諜血長天》，也是一個不錯的選擇，話晒有視帝、視后黎耀祥及胡杏兒擔正，劇中還有不少大膽情節，杏兒更被飾演日軍的黃子恆強姦，仲話有足足25秒，甚至連張枱都郁埋，聽到都心癢癢想睇，少年你太年輕了，如此精彩的畫面，想睇梗係要俾錢啦，在myTV SUPER就有足本播放，死未？兜兜轉轉之後，可能仲有網民不肯就範，估不到無綫連深宵時段都不肯放網民一條生路。

到了貓頭鷹時間，不少人追完《創世紀》之後，繼續睇《新紮師兄》續集，不過就有不少網民變晒小丸子「問題天天都多」，一邊睇一邊在討論區留言，問番上一輯的劇情，「點解fit佬會坐監？」、「偉仔同曼玉點解分咗手？」、「偉仔又話同老父不咬弦，家陣又咁friend嘅？」，《新紮師兄》係30年前的舊劇，睇過的朋友都未必記得劇情，何況不少人是第一次睇，《愛．回家》就話可以不用睇前文後理啫？有網民估計無綫如此做法，無非是想大家俾錢睇劇，以後經典劇可能只會重播續集或者第3、4輯，如此下去觀眾只能睇免費膠劇，慘不忍睹。