《巾幗3》myTV SUPER 11月播完　翡翠台12月免費任睇

近期TVB就有續集潮，除了《深宮計》，還有《溏心風暴3》等。不過，唔知大家記唔記得《巾幗梟雄》系列？第一輯柴九所講的「人生有幾多個十年？」，至今都被網民無限用；第二輯劉醒與梁非凡互相鬥咀的場面，早前還有網民繼續二次創作，將之與日本動漫主題曲Remix成新版本，可見兩輯劇集依然深入民心。2013年又再添食來個《巾幗梟雄之諜血長天》，但除了黎耀祥之外，演員陣容截然不同，女主角亦換上了胡杏兒。但據知當年拍畢後，因劇情牽涉雞姦情節，似乎超越了電視尺度，3年來都未有出過街。

直至TVB今年4月推出網絡電視平台myTV SUPER，《巾幗梟雄之諜血長天》亦終於可以見光，並在10月1日足本播出30集。倉低劇之所以有得出街，原因是網絡世界尺度比較寬鬆，劇情上不用左避右避，可以原汁原味地播放。只是觀眾剛在myTV SUPER付費睇完《巾幗3》，12月又會接住《致命復活》在翡翠台播映，大家話咁快就可以免費睇，同期還有2年前拍好，馬國明主演的《流氓皇帝》，即是話，早前在myTV SUPER付費收睇過《巾幗3》的觀眾，似乎蝕底咗！不過，《巾幗梟雄之諜血長天》在電視上重見天日，為避敏感劇情，應該會刪減一些鏡頭，不是足本出街。所以，myTV SUPER的用戶不用灰心，畀咗錢有足本睇，咁樣諗係咪會抵啲呢？唔……