汪明荃「曬」名貴手袋非炫富　羅家英豪語：冇三千萬都有五千萬

羅家英和「阿姐」汪明荃今日（24/11）現身西九文化戲曲中心出席粵劇記者會。提到阿姐早前在社交平台分享在家中花園晾曬名貴手袋照，引起全城熱話，她接受《香港01》訪問時表示：「其實呢啲習俗每個家庭都會做，你知唔知啲衫同啲袋要攞出嚟曬，係因為要消毒殺菌，因為香港濕氣重。其實我係曬太陽嘅曬，唔係曬命嘅曬！（怕唔怕曬得多啲袋會甩色？）你就想呀！點會曬咁多日吖！最多咪曬一日。（有冇數過價值幾多？）咁又冇喎！」

點擊下圖睇汪阿姐點曬袋：

旁邊的老公羅家英聞言即笑說：「手袋總值冇三千萬都有五千萬！（阿姐啲名貴手袋你送？）都有少少啦！百分之一咁上下啦！」而阿姐就話：「其實之前佢都有送過萬蚊嘅手袋畀我，都幾貴，可能佢係大發慈悲啦！佢當時可能係傻咗。不過當時收到呢個袋都幾意外。」阿姐被問下次要曬袋時，會否要家英哥連袋一齊曬？家英哥搶答話：「都好呀！可以保鈣！」