《Chill Club》收視屢創佳績　駱振偉預告：嚟緊有好啲強勁嘅嘉賓

駱振偉（Thor）昨日（8/5）出席在九龍灣舉行的ViuTV全新劇集《暖男爸爸》記者會。劇中化身富二代的Thor，受訪時坦言因與Maggie（張可頤）有大量對手戲，所以大感壓力：「我第一場戲就係同可頤食飯，拍完之後導演睇返片，話我演得唔夠肯定，之後我就同導演講，我真係好緊張，因為可頤喺我前輩，我係睇佢以前嘅作品成長，突然間要我喺佢面前做戲，個份壓力係好大，可頤佢都有教我點樣放鬆會演得好啲。」

提到他有份主持音樂節目《Chill Club》，節目每逢周日都會力邀重量嘉賓站台演唱，與無綫《流行經典50年》硬碰，成績不俗，Thor表示：「好開心我哋搵到個音樂團隊咁好，其實我哋一路都有睇住啲收視成績，真心好多謝大家嘅支持，其實我哋每一集都要花大半個月時間搵嘉賓去籌備，據聞嚟緊有啲好強勁嘅嘉賓會上嚟，但我問製作組，佢哋都唔肯透露，所以連我自己都好期待。」