《巨聲》陳康健月薪3000死捱　做藝員博曝光：完全生活唔到！

除了坤哥可以去紅館個唱，有唱片出又拍劇做男二，而許廷鏗亦叫紅歌紅人，但其餘《超級巨聲》出身的，大部份都只在娛圈浮沉。如曾經是第一代巨聲幫的隊長劉威煌要賣珍珠奶茶，雖然出碟無期，但總算是老闆，聞說月入8萬，無歌唱但有銀紙，心理自然較易平衡。

但同屬第一代《巨聲》的陳康健，生活就艱苦很多，當日參賽有港版曹格之稱，但在無綫捱足7年，每月只得3千蚊，他說：「我係part time藝員，收入好唔穩定，平均….我諗得3千幾蚊到，計晒在無綫所有收入啦，係完全生活唔到。所以都要教人唱歌幫補下，黑妹(李麗霞)都有搵我教唱歌，講緊都係幾百蚊一堂啫，今日唔知聽日事，連買份保險都諗過，究竟自己供唔供到？就算做全職藝員都係得萬幾蚊，但不停開工令你無時間做其他副業幫補。有時自己家用俾得少，都有啲唔好意思，但媽咪同家姐都冇咩嘢。我諗佢哋都明白。」

死捱博曝光

一個月3千元，隨便找一份part time 都多過這數字，那為何陳康健要繼續呢？他說：「好難去拿捏，始終咁多年，因為你唔知幾時會有個機會，因為無綫始終係唯一平台，我唔係最鍾意做戲，但最鍾意唱歌，坦白講喺公司都無咩機會可以畀我，堅持喺呢到做藝員，其中一個原因係希望借曝光率，等人知我係邊個，再希望畀佢哋知道我係唱歌。」

單親家庭攞綜援

TVB收入少得可憐，但好在有歌唱老師這份副業，令陳康健最高試過約有2萬元收入，最緊要他態度亦積極，可能跟他童年有關：「細個仲慘啦，自己單親家庭，同埋家姐、媽咪一齊住，都攞過綜援㗎，不過啲舅父好錫我哋，爸爸今年7月就過咗身，我同佢好耐無見㗎喇，好細個佢就同我哋分開咗，有次聽返佢依家嘅老婆講，話老豆都好proud of 自己個仔拍電視同唱歌。我記得有次爸爸陪我出電話咭，之後我畀低咗電話號碼佢，叫佢得閒搵我啦，但就無搵幾年啦，到再搵返嗰陣，佢身體就已經唔係太好。」

有女友不用做兵

坤哥、胡鴻鈞和許廷鏗等開個唱又出碟，陳康健反而沒有多想，他說：「眼紅人，不如諗下點做好自己啦，有時要觀眾接受你，未必你真係要唱成點，可能真係要有一個機會入屋，我等緊囉，但唔係要自己做到咩位，唱幾多唱片或開幾多場演唱會，反而好想人知道我唔止鍾意唱歌，而係好對音樂好熱愛，我會研究點唱歌，你遇啱同道人，人哋真係知㗎，唔係剩係講我好鍾意唱歌咁簡單。」

有人覺得陳康健似兵仔，但現實中他原來有女友，亦自知應該行肥仔路綫，他說：「有一輪唔知係咪興大隻，公司所有男藝員，全部都有40吋胸肌，8舊腹肌，我就諗其實我都幾特別喎，自己得個肚腩，我都係走得意肥仔路綫啦，我冇諗過自己靚仔啲會點樣喎？我呢啲樣有呢啲位去做戲，有啲角色靚仔一定做唔到，不過我就一定唔係兵，我有女朋友㗎，佢係全世界最識欣賞我嘅人。」