【一日四劇】無綫御用阿媽程可為恥笑頒獎禮：畀嚿膠我做咩？

40年拍逾100套劇　最恨拍廣告

翻查資料，Rainbow姐這位無綫御用阿媽，為1972年無綫第一期訓練班學生，同期有甘國亮、許紹雄等，在無綫前後服務接近30年，拍過111套劇，這位殿堂級綠葉，原來最想要的不是獎座，而是一個廣告，她說：「我冇留意自己出得咁密喎！做咗40幾年，咩類型嘅阿媽都做過，應該媽媽形象深入民心啦？但就半個關於媽媽廣告都冇人揾，呢啲真係整定，希望退休前有啦，依家嘅心態，有就做，冇就唔好死埋去搲，人哋都冇預你，你走埋去咪盏乞人憎。做咗咁多年，程可為三個字，觀眾都知我係乜水啦，唔通仲想攞視后咩？唔好咁癲啦，攞嚟做咩？一嚿膠，終身成就獎？更加唔好，畀舊膠我，睇見都好笑，求其一個三角型嘅膠，就開心到眼淚都出理？有冇攪錯呀？」

專業阿媽未結婚：我唔可以有家庭負擔

程可為多飾演人母，但現實中她未婚、亦沒有子女，但她不覺得人生有什麼欠缺，她說：「冇，絕對冇，因為我唔可以有家庭負擔，唔可以有人我要憂慮，我當自己隻狗係人咁養，我會掛住佢，又驚佢凍或者熱、會唔會肚餓又點，如果有家庭就更加多嘢擔憂，我會攪唔掂㗎，我會好大壓力。我而家好輕鬆，鍾意𣉤幾耐就幾耐，老啲自己會唔會老人痴呆，我就唔理喇，我唔會後悔，點解後生時有人追，而唔去結婚，我唔會覺得冇老公，冇兒女會唔舒服㗎，夜晚寂寞？更加唔會，我好多節目㗎！」

1996年，程可為由温哥華回流後多做媽媽角色，但年輕時都是力捧花旦之一，穩坐女二角色，當時一線女藝員為汪明荃、趙雅芝等，程可為未試過上一線，但她覺得沒所謂，她說：「嗰陣都叫做第二㗎喇，女仔嚟計，唔算妹丁，或者企埋一二邊嗰啲囉，又唔會眼紅人點解自己無得擔正，我好後生已冇呢個心喇，唔知點解，我都解釋唔到，好多人覺得我好強爭勝心，其實我唔係囉，可能個性生出嚟係咁。」

唔熱血 ≠ Hea做　「推劇？等發霉咩？」

和其他綠葉不同，程可為就像每間公司都有的老臣子，不會對公司要求太多，看落有點對工作沒有熱情，她說：「熱血？由細到老都冇熱血，但冇係咪等於hea做？絕對冇，我從來冇推過job，有時第一期訓練班同學聚會，佢哋都笑我，攪錯呀，咁少戲份妳都接？但我又無乜所謂喎。唔接，咁留喺無綫做乜鬼？等發霉咩？因為鍾意做戲所以咩都做，其實任何角色，你有心去做，都可以發揮。」

至於經常做媽媽角色，原來程可為沒有太大感覺，她說:「講真，喺無綫做得太多阿媽角色，但冇一個令我覺得好刻骨銘心，尤其時裝劇飾演嗰啲媽咪角色，無乜戲可以發揮，反而最記得《宮心計》，呢套唔係做人阿媽，但特別有場戲，我記得係第一日開工㗎，劇情講我俾人踢出宮又無任何倚靠，對我嚟講好有發揮，自己都好開心。」

炒樓賺1,500萬：「千祈唔好話我有錢」

不少現職或離職的無綫藝員，都數過無綫不是，但程可為反而有另一種看法，她說：「老實講，做老闆就一定唔願意出多啲錢畀伙記，做伙記又梗係想做少啲但出多啲錢，好正常喎！我就覺得你唔做呢份工，做其他，我諗都係一樣咁複雜㗎喇！嗰陣自己後生，公司有畀機會我，移民回流返嚟，呢十幾年都拍咗好多劇，咁我仲想點呢? 我又唔會追多啲人工，佢話騷錢加100蚊，我都係話咁好啦。其實加你100蚊已經好畀面你，係咁㗎啦！跟官咁耐唔知官姓乜咩？點都唔會加你一千蚊，你又駛咩咁緊張？你唔開心人哋都唔會加俾你㗎啦，大家都心照啦，有時佢哋叫我簽約，我叫佢打好，我就上嚟簽個名。我問都唔問，唔好期望太多，咁就唔失望。如果你覺得加100蚊係侮辱，你應該擰轉頭就行，講咁多無謂嘢做咩？」