【鄭秀文演唱會】吳鎮宇任嘉賓　Sammi︰佢緊張到手心出汗

鄭秀文（Sammi）昨晚紅館舉行第7場《Touch Mi 2鄭秀文世界巡迴演唱會2016》，神秘嘉賓是與Sammi合作電影《衝上雲霄》的「Sam哥」吳鎮宇，為了今次首次踏上紅館舞台唱歌，Sammi爆料指他專程跟老師學唱歌6堂，又笑指他緊張到手心出汗。「我要爆他小秘密，不要看他現在扮晒老定，其實隻手濕過一條剛剛洗濕嘅底褲。」鎮宇解釋：「我一踏入升降台，電筒一照，隻手就濕晒，濕到咁即係可以high起來啦！」全場大笑。

Sammi表示跟鎮宇合作拍電影驚到不敢打招呼，因為他工作超認真，Sammi自問出名嚴謹，但他比她更嚴謹兩倍，鎮宇說：「我好唔抵得，點解他們要咁做？有時無得返轉頭的！比如唱歌，唱得好不好都是一次，反正都賣晒飛收晒錢。但電影觀眾要睇片段先至買飛入場，唔能夠苟且。」Sammi表示跟他合作電影獲益良多，學到要對自己更嚴厲，所以演唱會走音時她痛哭，鎮宇笑說：「唔緊要，今日我來，走音比你更厲害。（你終於明白點解我今晚搵你來！）仲有，另一個係黃子華，他的楝篤笑好睇、但最好笑就是他自彈自唱部分。」

跟老師學唱歌6堂 非常認真

Sammi爆鎮宇為上台演唱3分鐘，專程請老師學唱歌。她說：「其實他一聽到我請他做嘉賓，他好快答應，仲馬上練歌，請老師練了6堂。我仲要爆多個秘密，他本來今日想整埋『Sam哥』蛋撻頭和着埋飛機師制服來，我話使唔使咁行呀你？他真是好認真！」Sammi回後台換衫，鎮宇對觀眾笑說：「唔使驚，Sammi唔回水，我走音，我回水！」音樂響起《歲月如歌》前奏，全場立即瘋狂尖叫。

完騷後，Sammi在休息前拍片放上Facebook，感謝鎮宇演出和歌迷的熱情。她表示非常開心，並透露梳洗後會飲媽咪的愛心靚湯、以及睇歌迷的留言，非常勤力。