【影片】譚詠麟陳小春解讀十個身分　最怕下一代步後塵

作為一位成功男士，身兼數職是何等閒事，「校長」譚詠麟與陳小春縱橫演藝圈多年，在舞台上、銀幕上是發熱發亮的大明星，回到家中則變回平凡的好丈夫、好爸爸，香港01與兩位分身不暇的大忙人談10個身分，時下流行玩Hashtag（標籤），不知校長與小春最愛「#」哪個身分？

譚：譚詠麟
陳：陳小春

＃爸爸

譚：和他（兒子）傾偈，因為你唔知現代年青人諗咩，起碼要知道佢交了甚朋友，同埋佢怎樣處事，一定要以朋友方式去傾偈，先知道佢結識甚麼人，從而幫到佢抉擇。
陳：我好嚮往（做爸爸），朝住校長做目標，好似佢個仔讀書咁叻就好。
（想下一代入行嗎？）
譚：好彩現在佢完全冇興趣，好辛苦，唔係個個捱得，我覺得我好另類。
陳：我不會讓他做，唔成功會卡在中間，到時候佢自己調整唔到咪大鑊。

＃丈夫

譚：我哋經常在出面工作，其實對他們來說都幾唔公平，所以有時間嗰陣，尤其我在香港，就盡量陪佢哋多啲。
陳：老公要孭起頭家，對得住天地良心。
譚：膊頭要闊囉！
陳：腰骨要直囉！

＃兄弟

譚：友誼係細水長流，交朋友能夠交到5年以上，之後開始慢慢可以講心，能夠交到上去幾十年呢，非常之難得。
陳：我以前好天真，以為係朋友，一世都係朋友，世界變咗，就唔係「一日朋友，一世朋友」，交朋結友都係要時間浸出嚟。

＃歌手

譚：當年我一年出兩至三張唱片，勁歌金曲頒獎嗰陣，有無綫高層搵我，佢話：「專業人士評審，你有8隻（歌）入圍，非專業就第1至第14隻都係你。」嘩！我話唔使咁霸氣呀？唔使咁多啦，我要3隻就夠啦。
陳：出唱片呢個動作我就真係冇諗過，點解？因為我覺得真係好浪費，十隻歌入面，主要都係plug一、兩隻，其他7隻你係咪真係plug先，如果唔需要，得閒做single咪得。

＃影帝

譚：我想遇到一個真係可以有得發揮嘅劇本，但可遇不可求，更加要考慮個角色係咪自己啱做，因為我個人太親切，一行出嚟已經笑定先，咁就唔係幾好。
陳：作為一個演員，你問我有冇向呢個目標（影帝）進發，我唔可以話冇，如果有（目標）先有火，只要提名過一次，我都覺得開心。

＃古惑仔

譚：以前我覺得古惑仔係好夠義氣，「夠雷」乜乜乜，今時今日好多都上咗岸，離開咗呢個圈。
陳：古惑仔係香港嘢、香港叫法，「黑社會」三個字唔出得街，如果係合拍片的話絕對唔得，只可以講「江湖」。

＃政協

譚：去到呢個位就順得哥情失嫂意，千祈唔好。
陳：我冇乜好提。
譚：過關係咪快好多？
陳：唔關事！唔會嘅。

＃男神

譚：有麝自然香，唔同年紀、唔同階段、唔同感覺都會出到啲味道，所以我冇刻意去迎合其他人口味。
陳：都唔知點嚟，邊有神㗎啫。

＃오빠Oppa

譚：我哋啲電影已經一早打咗入去（韓國），到今時今日有啲觀眾都仲認得我哋啲樣。
陳：本身韓國國民撐番自己，電影又好、音樂又好，佢唔需要外輸，唔需要放出去全世界，佢係自己國家已經夠食，本應吹日風，日風唔知點解又冇咗，好似陸沉咗咁，咁就更加吹韓風喇，夏日「韓」風。

＃網民

（有無玩《Pokemon GO》?）
譚：潮流嚟啫，潮流嚟得快走得快，我經過馬路，見人明明綠燈都唔過馬路，揸住架機好似傻佬傻婆咁樣。
陳：我自從玩完《他媽哥池》之後都唔玩呢啲。
譚：你啲兄弟好鍾意玩呢啲遊戲㗎喎！
陳：佢係呀，傻㗎嘛，潮流我唔係好明白，out咗啦。

場地提供：E-MAX
譚詠麟化妝：Eva Chuk＠Faces make-up studio
譚詠麟髮型：Perry Tang＠Silkcut Salon
陳小春化妝：Andy Leung＠ndnco
陳小春髮型：Beijing hair culture clifflan