【城寨英雄．睇清楚】阿電飛刀插中拳佬　真身竟是「長腳蟹」老公

今個星期《城寨英雄》的劇情繼續非常緊湊，日前講到拳佬（陳展鵬飾）及牙佬（袁偉豪飾）與馮春美（吳家樂飾）展開生死賭局，期間春美叫停「出千」的花曼（王君馨飾），誰知竟然聰明反被聰明誤，墮入花曼設計的陷阱，結果惱羞成怒，反枱兼大開殺界！

《城寨》的武鬥場面可謂信心之選，而這一幕的「群揪」更令人睇到血脈沸騰！

話說春美有三名武功高強手下，分別是火、雷及電，三人長期帶住黑帽、黑超，容貌比較難辨別，反正是標準的保鏢style。

當中阿電的「小李飛刀」就最利害，隨身綁住一套刀仔在腰間。「生死賭局」這一幕阿電更向拳佬追打，連放幾次飛刀，期間拳佬為了保護刁蘭更身中兩刀，睇到心都痛。

雖然阿電出手夠狠，但都不夠拳佬機智，身負重傷的拳佬在最後一擊傾盡全力躍起避開飛刀，再一手爆阿電頭。

如此驚險的場面，我們「慢鏡」睇一次：

阿電的戲份就此完結，而到底阿電是誰？其實他就是「長腳蟹」呂慧儀老公黃文迪(Dickson)，兩人於2011年結婚，再於兩年前誕下兒子黃柏翹。產後的長腳蟹專注家庭，今年開始重返公仔箱拍劇，更憑住《一屋老友記》中的港女角色余花大獲好評。今次容串殺手，一樣出色呀！

2015年重返無綫的Dickson亦不敢怠慢，除了《城寨》的阿電一角，亦有參與《愛·回家之八時入席》飾演趙麗虹（湯盈盈飾）的老公羅四維，Dickson今次在《城寨》令人眼前一亮，相信未來會有更多拍劇的機會。