【十二傳說】蔣家旻慶幸拍劇未遇過怪事　讀書時曾撞鬼嚇破膽

蔣家旻與《十二傳說》一班演員齊齊出席宣傳活動，自言膽小怕鬼的她表示：「好彩我拍戲未試過撞到鬼。」她拍該劇時要到全亞洲十大最猛鬼的元朗達德學校取景拍攝，她當時真的很驚。她說：「每次入去拍攝之前，我哋都要喺外面拜咗神先，同埋嗰度會有一位保安守住個門口。我手上仲戴埋開咗光嘅佛珠嚟辟邪。我有問個保安驚唔驚，佢話佢慣咗喇。」

家旻透露讀書時代曾經有過一次恐怖經歷：「我中一時參加咗女童軍，同啲同學一齊去宿營，我讀女校，幾個女仔都好驚，我哋就拍埋咗幾張床。有晚我一個留喺房執嘢，背對住門口，個身向住床前，我執執下嘢時『𥅈』到有對腳喺我後面經過，我以為係朋友，點知望向後面無人，咁我諗會唔會係自己眼花，繼續執，對腳又再經過，我再望都係無人，嗰下已經好驚，驚到成個人坐咗喺床度。之後我朋友返嚟，佢話佢頭先都無入過嚟，我更加相信我係遇到嗰啲嘢喇。」