【荷里活有個大老千】高溫赤裸肉搏蔡瀚億　吳業坤：流晒汗肉貼肉

吳業坤今晚（19/1）出席無綫節目《流行經典50年》錄影探班。坤哥表示：「今晚會獻唱梅艷芳經典名曲《夢伴》好大壓力，好在有位前輩帶住，佢就係劉雅麗姐姐，頭先都有夾過，佢都知係一首女仔歌，特登調教個key等我可以唱到，發揮自己嘅水準，好多謝呢位前輩嘅指點。」

熱播無綫劇集《荷里活有個大老千》日前劇情講到「舒奇」（飾蔡瀚億）孖住「墨基」（飾吳業坤）兩位沙煲兄弟收工回家後、因為爭廁所沖涼，而發生一場肉搏大戰。坤哥笑言：「嗰日個片場係冇冷氣，正值夏天，大家喺40幾度嘅情況下，兩個男人流晒汗肉貼肉，大家都好專業，好彩冇產生任何嘅感情，我哋拍嘅時候，兩個都着住一條肉色嘅底褲，可以話拍到底褲都濕，不過冇人會想睇囉！」