【是咁的，法官閣下．專訪】編審李茜堅持感情戲：冇會角色空洞！

《是咁的，法官閣下》今晚（1/12）迎來了大結局，雖然劇集的主軸是一班年輕大律師奮鬥故事，但仍然有不少「旁枝末節」──感情線，而編審李茜卻直言，一套劇有愛情線是相當正常，而且有不少演員第一件事就問她劇中有沒有感情線。原來一直以來，有觀眾不停說TVB過多多餘感情戲，但在演員和製作人員的眼中，卻是相當重要。
攝：葉志明

李茜是一名資深編劇，1979年便加入TVB，之前做過3年記者，主要採訪法庭新聞，第一部有份編劇的劇集叫《抉擇》，之後《輪流傳》、《播音人》、《老友鬼鬼》等80年代的劇集也有份參與。到過浸大電影學院教書的她，於2015年的時候重返TVB幫《四個女仔三個BAR》擔任編劇，之後就到《是咁的，法官閣下》。「做過法庭記者，對於點樣去審案有個基本嘅概念同認識，寫（劇本）嘅時候會順手啲。劇中所有嘅案都有參考案例，法庭有發生過嘅嘢，有參考但唔會完全搬字過紙，始終每件案我都有啲地方唔知，如果照寫落去，會對牽涉案中嘅人唔係好公平。」李茜說。

做過法庭記者，絕對有助她處理法庭戲事得心應手，她說：「要睇返邊個角色處理嗰單案。如果係師傅級嘅律師或大狀。咁啲案一定會大單啲、嚴重啲或複雜啲，但如果好似戲中嘅新仔，頭一兩年唔會打官司，通常係類似過堂、求情之類，個背景可能只會去到裁判處等地方。如果要去區域法院或高等法院，就可能要去到大師傅格離嗰個Junior，所以寫法庭劇本要考慮到係乜嘢人嘅戲，再安排啲乜嘢案俾佢。」

經歷多年的法庭聽審，對於李茜來說，比起觀眾只能靠電影或電視劇接觸法庭，知道的事一定更多。「例如打打下突然換律師，咦！原來係可以嘅，又或者打打下證人有啲問題，或者突然改口供，咁要點處理呢？又可能打打下場官司，個官覺得律師準備得唔充足，原來會鬧！喺《是咁的》每個案件裏面，我都想有啲新啲嘅嘢去帶出嚟，劇中每個個案都有呢啲元素，想觀眾睇法庭戲時增加多少少法庭嘅常識。」將睇劇變成學習知識的一種方法，絕對是一件不容易但偉大的事。「當然啦，法庭基本上係每個公眾人士都可以入去聽，但要花好多時間，一個劇如果可以除咗有一啲娛樂性畀觀眾之外，仲可以帶一啲知識帶到畀佢哋，咁其實幾好，增加佢收看嘅趣味性。」

在劇集的開始部分，有一個故事是用盧寵茂「倒地」事件作借鏡，又有學生集會等例子，被人覺得是政治抽水，不過李茜就有另一套看法：「抽水就一定唔會喇，我點樣去揀個案，一定有參考實質上有發生嘅個案，你公平啲去睇個事件，係一件校園事件，一個老師被辭退，或者叫不被續約，背後原因原來係佢唔肯再做『槍手』，學生覺得佢係一個好老師，呢啲個案其實喺唔同嘅大學係有發生過。我覺得如果我要寫一啲校園事件，我必然要參考一啲校園有發生嘅嘢，我完全唔覺得係敏感，呢啲嘢我覺得係可以講，點解唔可以講呢？學生喺校園有不滿示威，亦唔係今時今日先發生嘅事。」

正如李茜所說，如果有觀眾看完此劇，覺得劇集是抽水，她不會阻止這種個別想法，「但我作為編劇，我面對返整個個案，係有好仔細嘅佈局，唔係只係普通一個（劇裏面嘅）突發或衝擊，唔係就咁就算數。所以網民如果覺得係抽水，唔緊要，呢個係佢哋嘅睇法。」

重點來了，近來不少觀眾說TVB太多感情線拖戲，講法庭又有感情戲，講醫護人員又要感情戲，而且又是三角戀，太過老土。對於這個，李茜有獨特的看法，她說：「其實有兩種觀眾，有啲就會話冇愛情，佢想睇愛情；有啲又會話搞專業嘢搞咁多做乜，無啦啦又整個三角戀。我先講觀眾嗰度啦，通常我唔係好理，我覺得有就有，好似《是咁的》就唔多。但好似《四個女仔三個BAR》係後生仔女戲就會有，今次唔多唔係因為網民。另外，你講嘅係一個25個鐘頭嘅故仔，我覺得有愛情好正常啫，人係有感情嘅動物，你唔結婚有唔結婚嘅感情，結婚有結婚嘅感情，同居有同居嘅感情，我覺得如果整個戲冇感情線，呢樣係唔正常。」

不只觀眾，其實演員對感情線都有看法，不過卻是要求有感情線，「我同演員傾偈講個角色，佢第一樣就問你，我個角色有冇感情線。我先發覺原來對於演員嚟講好重要，真係十個有十一個係咁，因為感覺來自情呢樣嘢，所以對佢哋嚟講，你冇嘅話個角色係空洞。觀眾一定要明白，我從來唔覺得三角戀有問題，今次都有少少三角關係，其實仲有咩可以變化呢？兩個人互相鍾意，三個人四個人，係冇新嘢，我唔介意繼續寫三角戀或者幾角戀都唔緊要，分別在於人係有變化，你寫得好唔好睇呢，而唔係話又係三角？如果嗰啲觀眾覺得又係三角，咁咪唔好睇囉！真係唔好睇，如果真係為咗又係三角，唔好睇，轉台囉。」

其實李茜所說不無道理，一部劇，無論講的範疇有幾專業，有人的地方就會有感情，沒有感情線很可能會變成失真。