汪明荃親任Model提醒老友記打流感針　同李司棋IG互動好有愛

汪明荃 (阿姐) 最近憑住她獨門自創的「汪阿Tag」，火速成為了網絡紅人，一班圈中藝人亦爭相在IG上學阿姐呢招可愛的落Tag技巧，齊齊向今期紅爆的汪阿姐致敬。而玩IG玩得好開心的阿姐，呢日就出了一個好窩心的post喇。阿姐上載了一張她掀起衫袖騷手臂的靚相，留言表示：「溫馨提示：“老友記”記得打流感針！」來提醒一眾長者們，而她自己也剛剛打了流感針，所以手臂上貼有打完針後黐上的膠布。

阿姐咁貼心提醒，仲用埋自己做model真人示範，她的一班圈中好友、粉絲以及網民都紛紛留言回應，就連當年曾經同阿姐傳過不和的李司棋 (司棋姐) 都有回應她，令大家都覺得好意外又好驚喜。司棋姐留言話：「知道！」再加一個舉起手的emoji，好cute㗎。而阿姐就覆司棋姐話：「咁就乖啦。」

雖然只係簡單兩句，但係都好sweet好有愛呀！有網民仲話今次兩位阿姐係IG泯恩仇。於70年代阿姐與司棋姐、黃淑儀齊位列無綫三大花旦，有傳過她們以前拍劇時曾經爭寵，不過阿姐與司棋姐卻從未有公開承認過彼此有不和，而今次於IG上的互動就證明了兩人的感情不錯啦。

一齊睇下兩位可愛嘅阿姐喺IG嘅靚相啦！