汪明荃IG自創新玩法　潮爆TAG人方法陸浩明都即跟

之前有啲小學生喺街訪中話：「Facebook係老嘢先用。」時下年輕人都已經轉投其他社交媒體懷抱，IG係其中一個熱門之選。唔少藝人都有開IG帳戶，簡簡單單分享靚相加啲hashtag，又可以tag朋友方便share合照。汪明荃汪阿姐上個月都開咗IG 戶口，佢仲發掘咗個新玩法，大家學嘢啦﹗

10月9號汪阿姐正式開IG，仲UPDATE得相當勤力，無論人在香港內地定出埠登台，幾乎日日UPDATE新相，有時仲一日幾個POST開戶口短短41日已經有58個POST。早前佢出席保良局盆菜宴就發生件爆趣事件，成為網友熱話。

汪阿姐當日有份上台表演，著上紫色閃閃背心裙近6吋高跟鞋，同一班小朋友載歌載舞。表演完後汪阿姐到台下就座食盆菜兼欣賞表演，影落唔少相放上IG同大家分享。平時大家POST相TAG人係用軟件內置功能TAG對方帳戶，但汪阿姐就發明新玩法：手寫TAG人﹗朱咪咪蔡康年就咁寫人名，而一班高官總理可能大家未必太熟悉，汪阿姐就好貼心咁，將頭銜都寫埋上去，真係好貼心呀﹗

話時話，以手機寫字嚟講，汪阿姐手字真係好靚，仲再次成功帶領新潮流﹗見到陸浩明星期日晚台慶綵排時，上載嘅大合照中，都學阿姐咁手寫TAG人，跟得好貼呀下，大家要好好學習啦。