睇維密內衣騷同Gigi Hadid自拍　Heidi@SG：好多嘉賓都未必影到

過往曾到訪米蘭，出席時裝周的Super Girls成員李靜儀 （Heidi），日前獲美國殿堂級內衣品牌Victoria's Secret邀請去紐約睇內衣騷。這個內衣騷都是每年的城中盛事，除了雲集多位外國超模行Catwalk，更有多位重量級歌手獻唱，而首次置身其中的Heidi直言未出發先興奮。

為了跟偶像近距離見面，事前Heidi已做足「功課」，計劃了一個集郵路線圖。她趁開騷前走入後台，成功跟Gigi Hadid、Bella Hadid及Kendall Jenner集郵，Heidi直言相當幸運︰「我去到後台，見到佢哋準備行騷，竟然好大膽走過去問可唔可以影相，能夠同三位超模影相好好彩，因為有好多嘉賓都未必影到，所以我影到相係好幸運嘅一件事。」

Heidi亦大讚三位超模樣靚身材好，而且還nice到爆，除了Bella跟自己一起「嘟咀」合照，她還表示︰「我本來問Gigi可唔可以影相，佢唔止答應，之後仲拎我部電話自拍，真係好開心！」

此外，Heidi還透露平時愛儲不同款式的內衣，坦言家中有近50多套︰「不過只係着畀自己睇，有好多係因為靚就買咗，仲未着過。」她還笑說︰「細個時睇到model行騷好靚，好想大個後都可以行內衣騷，不過長大後就冇呢個勇氣，唯有係屋企對住塊鏡行畀自己睇。」