【是咁的，法官閣下】歧視女律師？　律師任建峰：有朋友選擇離開

法律面前男女平等？台慶劇《是咁的，法官閣下》日前播出的劇情就講到女律師楊萍（葉凱茵飾）因拆帳問題，不滿律師樓歧視女性而揚言：「你哋呢班男人，係咁蝦我呢個女人。我一定要…一定要告到你哋甩褲！」劇中更多次提到客人偏向請男律師作為代表律師，因為覺得他們比女律師更「信得過」。到底法律界真的存在男女歧視嗎？

點擊下圖重溫劇情

對此，執業律師任建峰接受《香港01》訪問時表示：「行內男女歧視絕對存在，但『客』呢方面就越嚟越少，唔算嚴重。反而，法律界女律師『難上位』的問題比較大。近幾十年，其實法學院的女同學比男同學更加多，但點解能夠成為資深大律師甚至合夥人仍然係男性較多呢？女律師能力絕對唔差，但佢哋其實要面對好多無形的障礙。」

對於無形障礙，任建峰解釋指：「無形障礙係，例如好多人會認為女律師要嫁人，怕佢之後唔想做咁辛苦，所以唔會升女律師先，令佢哋要轉做公司內部嘅法律顧問。仲有一方面，係女律師點做都『死』。男律師『以柔制剛』就畀人讚，女律師又會話佢哋撐唔到場。強硬啲又俾人話『八婆』，有時都真係好陰功！」任建峰更透露身邊的女律師朋友曾受到無形障礙而選擇離開。

任建峰更強調業界要正視問題，他稱：「其實呢個問題唔止法律界，係所有專業界都有呢個問題存在，甚至乎係會界計同工程界。其實依家比較有國際規模的律師行都開始鼓勵女律師『上位』，我覺得要改變嘅並唔係女性，佢哋一啲問題都冇，而係我哋呢班男人要變。」