【兄弟】李松蔓演反派打女上擂台　原來她本身是「舞」林高手

談起李松蔓（Lena、前名李天縱），相信好多觀眾第一時間會想法她的驕人身材，但其實她本身亦相當的有料到，1987年在香港出生的她，因為父母在阿根廷經營生意，細細個便搬到首都布宜諾斯艾利斯，並在當地讀小學。12歲時，她便到北京讀書，入讀北京市戲曲藝術學校附屬中學，先後到北京電影學院和中國傳媒大學兩間大學讀書，又識跳多種舞蹈，包括中國舞、民族舞、芭蕾舞和現代舞等，比起好多女藝人，更加讀得書、更加多才多藝，她接受《香港01》訪問時說：「我三歲就開始跳舞喇！」

可能是因為李松蔓身手好，最近不少劇集都找她演出有動作場面的角色，包括《宮心計2深宮計》、《天命》以及即將播映的台慶劇《兄弟》，她在《兄弟》中既要陀槍仲要打拳賽：「其實我個角色係保安兼秘書，因為好打得，所以Boss安排咗我去打一場拳賽，仲要贏埋，又幫Boss做咗好多嘢，反派角色嚟。（最近你都真係多咗打戲。）公司選角都有根據藝人嘅才藝，我從細就學跳舞，所以同類型嘅嘢我覺得我係有優勢。」

她坦言今次參演《兄弟》是一個挑戰，所以都好珍惜這個機會：「我想演反派好耐，因為反派好過癮！（但好多人都成日留意你身材，期待你性感演出，你抗拒還是歡迎？）演員係嘅工作同職業，專業嘅角度嚟講，我任何嘅表演都係出於我對角色嘅理解。」《兄弟》將於11月12日晚上8點半首播。