【跳躍生命線．專訪】張曦雯搵男友拒香港製造：我講笑話佢哋唔明

雖然無綫台慶劇《跳躍生命線》是專講救護員的故事，但竟然有一個主要角色完全同救人扯不上關係，她便是張曦雯（Kelly）飾演的車房技工兼芭蕾舞導師「阿Man」文暉，而最有趣的是一路以來報章雜誌都指這個「唔關事」的角色，是劇集的第一女主角。張曦雯接受《香港01》訪問時便說：「其實我冇特別去睇呀，最慶幸嘅係好多戲可以同男主角馬神馬德鐘一齊做，諗返起開始拍劇都係兩三年前嘅事，好多時都係靠前輩同我傾、同我分析個劇本，所以都好多謝馬神咁花時間幫我，我都學到好多嘢，咦，佢好唔鍾意人哋話佢教人，哈哈！」

本身擔任主持居多的張曦雯，到近兩三年才開始拍劇，由之前的《律政強人》（2016）、《降魔的番外篇 – 首部曲》（2018）到今年的《跳躍生命線》，以及尚待播出的《金宵大廈》、《白色強人》和拍攝中的《解決師》，絕對可說是比不少藝人多機會，她坦言自己想繼續在演戲方面發展，因為主持工作雖然開心但較演戲工作拘謹，而自己都好想搣甩「高貴大方」的《港生活．港享受》華姐形象：「當然《3日2夜》就唔係呢類啦，我自己鍾意講咩都得，玩得開心又可以感染到人，而做戲都係可以感染到人。其實監製（方駿釗）都同我講因為睇到我直播打機同我嘅《3日2夜》，見到我真嘅一面，覺得我好隨意，所以先搵我做『阿Man』呢個角色。」

沒想過入娛圈：「我都隨時都可以走！」

其實張曦雯的確好隨意、隨心，當初入行亦可算是無心插柳：「我冇諗過自己會入娛樂圈，本身做Model都係貪好玩，影下相又有錢咁。」在芝加哥長大的她參選華埠小姐亦是貪多個頭銜在身，可以較容易接到模特兒工作，但沒想過自己最後會連國際中華小姐都贏得冠軍：「贏咗之後我好掙扎，冇即刻簽TVB，都等咗成年，繼續做下Model咁，因為唔Sure自己適唔適合，我本身唔係好識講自己嘢。當時我有諗過不如返美國做嘢，覺得做Waitress都可以好開心，其實我呢一刻咁做都得，我隨時都可以走，如果我覺得自己做得唔開心嘅話。」

辛苦搵錢供車：俾人講我係收人車係有少少唔Gur

說真的，入娛樂圈做藝人比起許多工作更具挑戰性，付出的時間、金錢不是行外人能夠完全理解得到，所面對的流言蜚語也比平常人多，以張曦雯為例，正式入行短短5年，便已經先後傳出多段緋聞，更有報章雜誌明言暗指她專釣金龜，所以要唔開心都確實可以好唔開心。不過，張曦雯卻覺得還好，從來未會被類似新聞影響：「我唔知係社會問題定點，好似總係對女仔有偏見咁，特別係做呢一行，覺得我哋唔係靠自己能力，其實我唔止搵咁少囉，唔需要靠人哋。」

其實張曦雯入行以來密密接Job，珠寶活動、周年晚會都經常找她擔任司儀，當每單工作只得5位數字酬勞，近5年搵到7位數字都絕對不難，就算一口氣買一架過百萬的名車亦絕對綽綽有餘，堅稱自己單身的她說：「其實我都要供嘅，如果真係有人送車畀我，咁樣畀人講真係冇所謂，最慘係我係自己辛辛苦苦搵錢買自己鍾意嘅嘢，咁樣畀人講我確實係有少少唔Gur。當然，有話題先算成功，呢一行係咁。」至於理想男友，在外國長大、文化背景相近，比起有錢吸引得多：「我都識過啲Local男仔，我講嘅笑話佢哋唔明，佢哋講周星馳我又唔係好明，個笑點都唔同，咁樣一定好冇癮。」

化妝：Leo Tam
髮型：Echo Wam @ Headquarters
服裝：L.Carene
場地：九龍貝爾特酒店