張敬軒水着look處男下海　孖當奴當街出浴

繼之前張敬軒同商台DJ細So拍攝節目《天才遊童2018-東京篇》之後，昨日（23日），這個「天才遊童」系列又有新章節，今次軒仔就同Donald（當奴）去了澳洲拍攝「悉尼篇」。兩人去到澳洲這個陽光與海灘的地方，決定做個beach boy玩滑浪，軒仔更會以水着look登場！

軒仔同當奴去shopping買「泳衣」，揀好戰衣試身之後，他們好益街坊走出試身室向大家展示，由頭包到落腳的「水着look」將他們的美好身段表露無遺。期間阿奴還大講有味笑話，說換衫時見到軒仔一個神秘的部位有個好細的紋身：「個『米』字嘅紋身其實人人都有。」軒仔亦不甘示弱，笑住講着住膠衣的阿奴是「蟻俠啲friend『矮俠』」，相當風趣。

去到Bondi Beach，軒仔同阿奴好似《激戰》的「賤輝」上身，打拳膝撞頭頂籃跑沙灘爬樓梯，拍得入型入格。到正式跟教練做熱身及陸上模擬滑浪動作時，兩任即刻滑浪變滑稽，最搞笑就是他們一齊拎滑浪板，軒仔見到有鏡頭影住，原本彎晒腰拎得很辛苦的他即刻伸直條腰說：「拍緊呀，型啲型啲。」鏡頭一轉，軒仔就變作一個人頂住一塊滑浪板，都幾型嘅。

終於來到實戰，只見軒仔同阿奴不下數十次跌落水，玩了超過兩個鐘之後，大家都出現疲態，最後軒仔成功企到起身兼維持到三秒左右，同行的工作人員都忍不住拍手歡呼，真是感動到喊！對於今次滑浪初體驗，軒仔表示超級好玩，不過比想像中難：「除咗平衡，仲要食返個浪嘅走向，不過我呢啲天才兒童都好快上手，哈哈。」