試玩喪屍館大叫救命　梁嘉琪：我問工作人員想中途離開得唔得？

梁嘉琪今日（12日）主持實境喪屍館開幕禮，她表示場館選在一個荒廢已久的商場是一件非常瘋狂的事，她稱之前挑戰日本急樂園的鬼屋時還算是可以忍耐「捱埋佢」，但今次卻令她大呼救命：「呢度真係好大，我有問工作人員如果我想中途離開得唔得，佢話『sorry呢度無得中途離開』。平時玩一個鬼屋係10分鐘之內，但係玩呢度係要半個鐘困喺度！」

她稱幸得Solar大孖（Julio）跟她一起率先試玩：『我已經係開住燈玩，但我一開始已經係癲咗！我同Solar Julio一齊玩，之後我係咁扯住佢，然後佢係拖我，我係一路冼住咁入去！」嘉琪笑稱玩完後終於明白為何工作人員要分開她跟馮盈盈：「我行到尾嘅時候聽到有人喪叫嘅，跟住有人同我講，因為原來盈盈啱啱開始玩，我以為我自己已經好勁，我輸畀佢啊！」

嘉琪自爆以前試過跟男神一起玩鬼屋被嫌棄：「佢一出到嚟話要同我絕交！因為我係咁搲佢啲肉搲到有痕，佢話『我唔要再同你玩！』結果嗰次之後就真係無朋友再肯同我玩！」

睇《屍殺列車》嚇到要坐男友大髀 　馮盈盈：佢就覺得Sweet！