【再創世紀．專訪】楊怡接受唔到老公偷食：冇㗎啦，冇take two！
《再創世紀》中的章明晞（楊怡飾）心狠手辣，為求目的不惜犧牲身邊的人，雖與賀天生（郭晉安飾）結婚成為夫妻，最終卻反目並出賣他。當然，現實還現實，戲還戲，楊怡與章明晞的性格實在是南轅北轍。
「我現實唔係一個好有野心嘅人，大家都知㗎啦，我係比較一步步嚟。」1999年成為TVB藝員之一，與很多藝人一樣，她的演藝之路並非一步登天，而是從低做起。20年前初入行的她只是《萬千星輝賀台慶》中的「歡樂小姐」；經過20年後，終於成為了電視台「一姐」，同時也成為了TVB首位的「大滿貫」（包攬無綫所有四大組別獎項女演員），但她卻選擇在事業的高峰點離巢。
我覺得做女強人好痛苦。我唔係一個小女人，我只係一個普通人，亦都係一個事業女性。
因為結婚才離開TVB？還是因為離開才結婚？ 兩者都不是
自古愛情、事業倆難存，尤其是華人社會中的女性更甚。2016年楊怡離開工作18年的TVB，同時與拍拖5年的羅仲謙步入教堂。很多人認為楊怡在愛情與麵包之間選擇了愛情，不過她本人卻有另一番解讀。「離開TVB只係想試多啲新嘢，見多啲出面個世界。老實講我同佢結婚都冇Plan。我覺得嗰時再唔走，就只會拍劇拍劇拍劇。感情進一步咪係結婚囉，同時又可以多啲時間照顧屋企，嗰時我都冇同公司講。只係覺得Timing幾好，咪結囉。」套用一句說話形容就是：「沒有最好的時機，只有最適合的時機。」
我辛苦佢咪唔使做囉，有時連開7日，真係好攰，但傾電話時知道佢睇緊電視或行緊街，咁就足夠啦。
楊怡「黐家」的理由，可能是因為他
楊怡的婚後生活，還是一如以往的忙碌。不過忙碌的工作中，楊怡卻多了一個掛念屋企的原因。「如果以前有魄力嘅，（拍劇）一套嚟一套去，我會覺得時間過得好快，但係宜家去大陸拍劇，一去就去3，4個月，對我嚟講我又未必想逗留得咁長。幾個月可能返得嚟一次，我都試過留喺大陸拍劇，一拍拍3個幾月。我好黐家㗎，我真係好掛住屋企，會成日諗：『幾時拍完吖？』但係又好有動力喎。即係會每日都數住日子：『哎呀哎呀，今日完啦完啦。我今日拍埋呢場，聽日又一集啦。』會好有個動力鞭策自己快啲拍完。」
楊怡愛上老公羅仲謙的一刻
談起楊怡和羅仲謙相識的當初，以至那個讓楊怡心動的「Magic Moment」，楊怡卻笑著說：「冇㗎喎！」
但聊著說著，楊怡又記起了一次中秋節發生的事。「我記得有一次佢係幾細心嘅。嗰日佢知道我哋拍到好夜，唔知係咪專登啦，佢明明已經走咗放工㗎啦，佢都返轉頭買生果送俾大家食，又買埋啲蛋糕返嚟。我嗰時就覺得：『吖，呢個男仔幾好喎，都幾nice。』吖！仲有一樣嘢。佢好有禮貌嘅，佢會唔該前、唔該後。宜家我有陣時都會話佢：『唔使咁多唔該啦。』我覺得人好得意嘅，當你見到佢同人相處開心，就會好願意接受佢。你會願意去同佢講嘢同佢交流。」
如果老公同賀天生一樣都去「偷食」...
電視劇《再創世紀》中的章明晞（楊怡飾演）與賀天生（郭晉安飾演）似生意伙伴多於夫妻，夫妻之間又各自各「搵食」。現實中的楊怡又接受到老公「偷食」嗎？楊怡想也不想就說：「冇㗎啦，冇take two，哈哈。首先，我要知點解你要偷食先，我覺得男人，可能有時都會有一下貪新鮮嘅感覺。」楊怡思考了一會又說：「因為我有時都會問佢：『男人點樣睇女性？』結咗婚之後會厭㗎嘛，耐咗冇火花同激情，總會有啲悶。佢會答我：『呢樣冇問題㗎。』」
男人（同女人嘅關係）係咪要一定要建立喺性嗰方面？唔係㗎嘛。
訪問內容精華，請點擊睇片：
楊怡：「我覺得男人嘅需要可以係，突然有一下貪新鮮。你嘅意識出軌嘅話，我覺得冇問題。我有時都會同佢一齊睇咸濕嘢或者咸濕笑話都會聽，但係我相信佢唔會（偷食），如果佢真係有咁嘅情況發生，我諗...我唔知。我覺得，我對自己有信心嘅，我對佢都有信心嘅，應該唔會發生呢樣嘢。唉，搞到我唔識答添。（記者：剪咗佢囉。）剪咗佢條電話線？等佢以後都充唔到電？哈哈哈。」
服裝：Quarter
髮型：Hanmi Hair
化裝：TY
場地：8度海逸酒店