【再創世紀】郭晉安做奸角不再孤單　孖楊怡做「腹黑CP」

劇集《再創世紀》舉行宣傳活動，劇中男女主角郭晉安（安仔）及楊怡均有出席。《再創世紀》是楊怡第一套回歸TVB之作，對於星期一晚的首播，她都表示有點緊張：「緊張都有少少嘅，始終都好耐無返黎Tvb拍劇。不過有好多我合作過嘅演員都喺度，我又唔太驚嘅。」

近年演奸人演到得心應手的安仔，又再一次飾演「奸到出汁」的角色，被問到與先前的角色相比有否不同？安仔回應：「我以前演嗰啲反派都比較孤單嘅，都係得我一個做反派，但今次同阿怡一齊又唔同喎！兩公婆一齊做反派無咁孤獨。」

安仔指今次跟一般奸角不同，笑稱自己和楊怡是一對「手腳好乾淨」的反派。楊怡說：「我哋又無殺人放火，老公你有無啊？」安仔：「有！不過唔係我做！」

劇集已經率先在內地播放，被問到有否留意內地網民的反應，安仔表示學會了很多如「爽」、「超話」這些潮語。楊怡笑稱見到有網民以「腹黑CP」來形容二人：「我唔明架其實呢個『腹黑CP』，但係佢哋解釋咗原來叫做滿腹密計，笑裡藏刀。」

先前羅仲謙指希望能有兩個小朋友，不知道楊怡忙完宣傳後，有沒有時間能實踐「造人」大計？「無所謂嘅幾多個都其實，可能有四五六個都唔定呢，可能有一隊足球隊呢，好難講嘅。」（會否向安仔取經？）安仔笑說：「我無生過喎，我老婆生嘅！」