【後生仔傾吓偈】馮盈盈到底有幾多個寶寶？　麥明詩：係未知數

最新一集《後生仔傾吓偈》以「前度的遺物」為題，節目一開始，六號就問大家拍幾次拖先為之夠，雖然大家聽到之後都話起碼四至五次，而麥明詩亦都表示：「呢啲嘢永遠都唔夠」，但現場就有位忠堅份子寫下「有了寶寶已足夠」，唔使多講，相信大家都估到係馮盈盈啦，不過FYY呢個放閃，就即時引起眾人圍攻，麥明詩更口衰哀咁話：「佢個寶寶只係一個未知數、一個X，呢個唔得，下個都係叫寶寶。」六號之後更叫FYY寫出之前拍過幾次拖，又笑FYY應該有「寶寶0.1」、「寶寶0.2」，面對眾人圍攻，FYY處變不驚，仲笑晒咁同寶寶派定心丸，結果惹來麥明詩懷疑佢最近一定係做錯事，所以先會瘋狂放閃。

幾位主持之後討論到會唔會保留前度所送嘅禮物，麥明詩表示會留起所有卡片之餘，更會得閒就翻看，之不過，六號同FYY就話唔會，六號解釋前度多數係送電子用品，所以沒有太多保留的價值，但照片如果曾上載到FB的話，六號就話唔會刻意刪除。至於同樣係話唔會保留前度的遺物嘅FYY，佢話試過未分手就已經整唔見男友送比佢嘅禮物：「因為佢整咗本相簿，所以想好好收藏，結果收得太好唔知去咗邊。」但好最笑係FYY話曾經收過一過男仔送嘅電話殼，個殼印有FYY樣，佢借花敬佛送咗比寶寶，「佢試過喺有30幾個佳麗嘅旅遊巴，拎住個殼出黎尋人。」睇嚟寶寶都真係好愛FYY，見真人都唔夠，連個殼都咁珍惜。