【後生仔傾吓偈】馮盈盈唔覺意得罪未來奶奶　點男友斟水又唔執碗

馮盈盈真係為《後生仔傾吓偈》帶嚟好多歡樂，最新一集繼續以「最不可得罪的人」為題，但內容就婆媳關係為主，同醫生男友感情要好嘅FYY喺呢個topic之上，當然要俾少少鞋油啦，雖然佢話未來奶奶好隨和亦都好遷就佢醫生男友，但平日見面時，大家都好客氣，令FYY總係覺得差少少嘢，6號為安慰FYY，於是就話「怕問太多會被覺得八卦，但其實你啲嘢睇報導、上網都知道晒。」之後更不停回帶FYY在《後生仔》的出位言論，例如係點解第一次拖手會濕晒等等。

6號教路FYY要在家庭聚會中，表現得十分照顧男友，令對方父母感到安心，但FYY就似乎完全唔知呢一項奶奶政策，並表示：「真架？我仲同寶寶講想飲水」咁都未夠，FYY話之前送寶寶遊戲機，令對方日夜沉迷打機，講到呢度，6號同麥明詩都指FYY做得好錯，為了尋求補鑊方法，於是問FYY去未來奶奶屋企食飯時，有無幫手煮飯、執碗等等，FYY面都青晒話無，並解釋：「有時想幫手拎啲碗入廚房，但奶奶都會叫我休息。」FYY呢個答案即時引來不滿，眾人齊齊表示：「你都要照做架。」最好笑係有後生仔問FYY有無幫手盛飯，FYY一時聽唔清楚，竟然問：「乜嚟㗎？」隨即又成為眾人圍攻對象。
 

為表示自己真係對未來奶奶好好，FYY試圖舉例說明：「知道未來奶奶關節痛，我特登拎啲贊助……」結果又再引來一眾主持圍攻，指佢唔應該轉贈贊助商禮物，又笑言「就算係真你都唔好講嘛」，綜合以上所有嘢，看似係FYY的錯，但麥明詩就認為「氹奶奶係兩個人嘅責任，唔係盈盈的責任，因為有啲嘢佢唔知架嘛。」男友瞬間成為罪人，FYY再落藥指男友完全唔幫手，就連未來奶奶生日係幾時都唔知，令佢無得準備禮物，聽到6號教路「auntie生日你哋一齊去買禮物，佢會好開心」之後，FYY就笑住咁話：「但係我寶寶話令佢哋開心，係快啲生個孫比佢哋湊喎。」結果話題馬上伸延至婆媳糾紛，令FYY都唔知嬲好定笑好，不過經過呢集《後生仔》，相信FYY一定會同未來奶奶關係更好。