【黃金有罪】80後姚子羚未用過Call機：月費成幾百蚊真係好貴

無綫新劇《黃金有罪》一眾演員今日（21/9）出席電視城舉行的造型活動。故事題材以香港70年代作為背景，當年經濟發展迅速金融行業盛行，發生多宗金融騙案。故事講述姚子羚、蕭正楠兩人先後到張兆輝股票行工作，子羚因而愛上張兆輝，並在劇中展開三角關係。子羚話：「套劇講我本身屋企有啲錢，老豆因欠債走咗佬，剩低我哋三母女，後尾去咗蕭正楠屋企住，佢屋企同樣有三個男人，對住我哋三個女人，蕭正楠因而鍾意咗我。」

此外，子羚透露在劇中會有三個不同造型，隨著故事的發展，之後會變得成熟，穿著返讀書的時候「Y」字頭品牌的喇叭牛仔褲，為配合個假髮，還要將前面的頭髮剪短。「今日我呢一個打扮係一個Call台妹造型，令我回想起當年冇手機年代，自己讀書嘅時候真係冇用過Call機，月費成幾百蚊真係好貴，後期儲咗好耐錢，等到出我人生第一部「摺機」手提電話。」蕭正楠表示：「我哋拍呢個年代嘅髮型真係又厚又長，短時間真係留唔到，戴假髮就最快最似，不過後期會變得成熟啲，同張兆輝搵到錢，成個造型都會改變，之後我可以用返自己頭髮。」