【黃金有罪】孖田蕊妮拍《逆緣》監製新劇 劇迷嫌鄭俊弘趕客
無綫金牌監製王心慰（Amy姐）曾打造《烈火雄心》、《梟雄》、《逆緣》等劇集，一年一劇嘅Amy姐即將開拍新劇《黃金有罪》，維基百科以「民初懸疑題材的電視劇集」介紹《黃金有罪》的劇種，女主角為Amy姐愛將田蕊妮，其實田蕊妮去年連拍《誇世代》、《超時空男臣》以及《迷》，加上倉底劇《蘭花劫》出土，去年共有四套劇播出，她已表示要抖抖，再加上她為了今年專心錄歌，所以已經快一年未有接劇，但如今Amy姐開劇，田蕊妮都係時間歸位啦。此外，朱晨麗、陳瀅以及劉思希亦將會參與新劇演出，劉思希早前就喺微博上載了幾張造型照，並表示：「70年代是一個怎麼樣的年代呢」照片中，劉思希身穿喇叭褲並配上短毛衣，加上一頭曲髮甚有70年代的感覺。
至於男主角方面，就有張兆輝同鄭俊弘，張兆輝擔正的《飛虎之潛行極戰》在內地的點擊率達到至少30億，續集已鐵定於年底開拍，但張兆輝早已表明唔會參與，未知是否因為要拍Amy新劇。對於新劇的陣容，唔少網民都十分有意見，特別係鄭俊弘，一面倒指「鄭俊弘十分趕客」，其實自從戀上何雁詩後，鄭俊弘事業全面插水，過往都會為大台劇客串嘅佢，自《與諜同謀》後未再有拍大台作品，巧合的是，去年《逆緣》開拍前，有指鍾定國一角原屬鄭俊弘，但後來因與何雁詩的戀情而遭易角。
早前鄭俊弘於商台節目《一圈圈》接受訪問時，他亦有提到易角一事：「係有傾過，不過未落實，本來嗰日（新聞出街）要開會，監製都有打比我問我心情點，我都好坦白同佢講唔太好，佢叫好休息吓，唔好去開會、亦都唔好諗角色、劇集嘅嘢住。之後有在公司見到Amy姐，佢話合作唔到好可惜， 拍攝上合作唔到，但呢首歌係你唱，所以就唱了《逆緣》的主題曲。我自己都好少同人講呢件事，Amy姐個支持、鼓勵係好多，係好感動。」估唔到Amy姐俾完主題曲鄭俊弘唱之後，開新劇都要預佢一角，呢份恩情，相信唔係一句「好感動」就還得清。