【她媽的葬禮】劉玉翠關寶慧相識30年首合作　勁講寸爆夭心對白

由PROJECT ROUNDABOUT計劃，張志偉、劉雅麗監製，劉玉翠、關寶慧和黃呈欣主演的舞台劇《她媽的葬禮》（The Memory of Water）將於10月9日首演，由於反應熱烈，昨日（8月31日）宣布加開4場（10月19至20日晚上7點半、10月20至21日下午2點半），加場門票亦已於今日（1日）公開發售。早前，三位主角便接受《香港01》專訪，大談自己對舞台劇、對親人以及對葬禮的睇法。

好難想像到《她媽的葬禮》這齣舞台劇是劉玉翠和關寶慧這兩位演員的首次合作。同樣於1990年在香港演藝學院畢業的兩人相識差不多30年，在演藝界亦兜兜轉轉了30年，之前間中都會相約一起打麻雀，但原來自畢業後一次幕前合作都沒有。多得PROJECT ROUNDABOUT，將這對好朋友再拉在一起。如果你沒有聽過PROJECT ROUNDABOUT，容許這裏為大家簡單介紹一下，它是一個為期三年的戲劇計劃，不以傳統劇團方式運作，由潘燦良、蘇玉華和張志偉擔任召集人，目標是希望參與的演員透過計劃疏理演技，他們上年製作的《謊言THE TRUTH》（由潘燦良、蘇玉華主演）叫好叫座，即使今年6月再度重演仍是場場爆滿。今年，他們便向觀眾呈獻英國劇作家Shelagh Stephenson成名作《她媽的葬禮》（The Memory of Water）。

大玩黑色幽默　三姊妹性格各異

上年的《謊言THE TRUTH》是偷情喜劇，今年的《她媽的葬禮》卻充滿黑色幽默，故事講述三姊妹因為母親葬禮而久別重逢，一邊追憶往事一邊互寸互窒，每句對白都夭心夭肺。不過，黑色喜劇與平常看到的喜劇、正劇有何分別？香港演藝學院戲劇學院一級榮譽畢業生、飾演三妹的黃呈欣便以一則新聞為大家解釋，雖然她講述的故事與所指的新聞有所出入，但絕對令各位更能清楚何謂「黑色喜劇」，她說：「之前美國有班消防員救咗隻爬咗上樓但落唔返嚟嘅豬，個主人為咗答謝班消防員，就殺咗隻豬搞BBQ，真係幾好笑，因為件事係好Ridiculous（荒謬），但如果用另一個角度睇，呢件事其實係好悲哀，所以係所謂嘅Black Comedy（黑色喜劇），係角色、作者對事物嘅睇法。」

談到《她媽的葬禮》本身，黃呈欣便指三位主角都各有性格：她飾演的三妹活在當下及時行樂，飾演二姐的劉玉翠理性行先，而大姐關寶慧則凡事孭上身。問是否有很多極消耗能量的嗌交戲，她們即笑指確實不少，其中劉玉翠便指她們三人極多單單打打專攻對方弱點的寸爆對白：「就好似平時對屋企人咁，篤得好盡，但去到最盡處又留手，因為你唔係仇人，我唔會整你死。」

演話劇勁緊張　關寶慧最驚突然喉嚨痕

提到劉玉翠、關寶慧兩人不似黃呈欣靠舞台劇搵食，劉玉翠更是很多年沒有在劇場演出，對上一次已經是《情話紫釵》（2011年公演、2012年重演），飾演二姐的劉玉翠就直認對舞台好生疏：「好驚，舞台劇演員嘅狀態真係好重要，聲線、呼吸、持久力，成兩個幾鐘喺個台上面！」而其實這齣舞台劇可能比起其他舞台劇難度更大，因為全場兩小時多，中段抽走慣常的15分鐘休息時間，讓整套劇一氣呵成。雖然飾演大姐的關寶慧比起劉玉翠經驗較為豐富，但她仍然好驚上到台會出事：「我有鼻水倒流嘅問題，一流落嚟就會咳，一咳就停唔到。最近去睇舞台劇《好日子》，我入咗去三個字就開始咳，之後全場喺出面睇電視。我又試過做《星海留痕》臨演出前勁咳，好彩上到台冇事。」

當大家以為黃呈欣因為她畢業後近10年時間都勁做舞台劇不懂得緊張時，她即笑謂：「我都好緊張！我其中一個老師講過，如果一個人演出唔再緊張時，就應該要好好反省自己。」問她點睇劉玉翠、關寶慧這兩位演藝學院師姐，她即大讚兩人好肯「Give and Take」（互相讓步）：「但當初監製同我講係兩個明星做我家姐，我真係有啲緊張，當時我唔知係佢兩個嚟，好驚啲明星放唔低偶像包袱……」她又笑指初初見到關寶慧時覺得對方樣子有點惡：「同Alice（劉雅麗）一樣！點知原來佢哋兩個都係傻。」

講起痛失至親濺淚　劉玉翠靠對白療癒自己

相信劉玉翠和關寶慧都沒有想過，自己在訪問中途淚腺決堤。當講到《她媽的葬禮》談及失去至親，兩人即開始哽咽，黃呈欣眼見兩位師姐雙眼通紅，亦連忙拿出紙巾好讓她們拭淚。劉玉翠直言不知道自己為何仍會喊：「可能係仲有好多內疚、遺憾，自責、憤怒，就係因為好多嘢好想做，但係佢唔畀時間你。我媽媽走得好突然，兩個星期就走咗。我同佢係又愛又恨，又苦又甜。」她坦言如果在街上看到與媽媽裝扮、年齡接近的老婦，總會想像到一個畫面：她拖着媽媽的手，一起行街，講說話氹她，再沒頂咀衝撞，非常幸福快樂：「但呢啲只能夠喺想像中發生，我只能夠接受呢個現實。」

兩年前喪父的關寶慧亦坦言失去至親的感覺是刻骨銘心：「我好單純，我從來冇諗過佢會死，因為佢好長命，走嗰時97歲，我以為佢會有百幾歲，佢返工返到96歲，喺船務公司做文書。其實依家揸車去中環，我都唔敢去接佢放工個位，我爸爸真係一個好好嘅爸爸。」

而《她媽的葬禮》本身，對於兩人來說，其實都算是一種療癒，而劉玉翠亦指透過此劇，意識到自己的「殘忍」：「嗰時我接受唔到佢會老，我要佢一直都咁堅強，要好似個後生女人咁，幾殘忍呀真係，但原來佢真係會死，而呢個劇就令我諗返呢啲同媽媽未解嘅糾結，有個舒緩喺度。」

理想身後事　黃呈欣希望可以天葬

至於她們心目中理想的葬禮，三人均指自己直情不想搞，當中關寶慧便指葬禮只是一個儀式：「一個人走咗，留低嘅都只係肉體，你點整都係咁，你要懷念一個人，喺個心裏面懷念都可以，唔使搞咁多嘢。如果真係有朋友想紀念我，當然呢個唔係我遺願，而係佢哋自己想搞，不如搞個Party飲下酒。」而黃呈欣便指自己好想天葬，但發現原來天葬好貴，劉玉翠聞言即笑謂：「行去非洲死咪得囉，行定去死，哈哈！」非常搞笑。