《女皇撞到正》張繼聰慘被女神折磨　周秀娜：唔知點解好有快感！

由張繼聰及周秀娜主演的電影《女皇撞到正》今日（28日）晚上舉行慰勞宴，提到二人的合作最難忘是什麼？娜姐表示：「最難忘是同佢演感情戲，我仲記得有一場係拍攝折磨佢，點樣令佢開天眼，又爆佢樽等等，一嚟我唔係咁好意思折磨佢，但拍攝過程真係好開心，我唔知道點解，好有快感。」阿聰直言：「其實同娜姐合作好開心，佢真係一個好對手，同佢拍之前傾過好多次電話，點樣可以做好啲，佢真係一個好專業演員。」

阿聰笑言在拍攝這部電影時有很多瘋狂想法，但一時三刻又難以形容：「其實你咁問到我，我又突然好難答，又唔算太瘋狂嘅，有少少對白上寸娜姐，咁戲中我哋係歡喜冤家，我會有時候寸下佢做咩扮女人，大家都知道佢係女神，但我都會係咁鬧佢，你哋可以鬧我係有少少變態。」娜姐認同阿聰的說法，因為拍攝時候不知道他何時真何時假。

二人指《女》片好合適一家人進場觀看，是一套很溫馨小品電影，問到二人戲中會否很多親熱戲？二人笑言並不多，還望開拍續集時會有較多親熱戲份。