鄭秀文被網友問私密問題　屋企有無掛結婚相？

鄭秀文（Sammi）最近四出為新歌《Creo en Mi》宣傳，作客Big Big Channel直播室，接受主持許文軒(Edmond)和網民即時提問，網民問題相當有創意，當中更有些貼身問題，不過Sammi 都有盡力滿足大家的好奇心！

除了Sammi 的新歌，大家最關心的是Sammi的私下生活，有人問Sammi 私底下會不會叫許志安(安仔)做老公，Sammi 說：「唔通叫佢老爺咩？其實真係好少叫老公，不過外出介紹佢，都會同人講呢位係我老公。」但至於會點叫安仔，Sammi 就支吾其辭，話會有另外嘅稱呼，可能這個稱呼真係好骨痺出唔到街。有人問Sammi 屋企有無掛結婚相，Sammi 大讚呢條Good question，她說：「都有掛少少啦。」

亦有人問得好私密，問Sammi 床頭有無擺公仔，她回答說：「有，床頭有兩粒，好細的，一隻狗仔，一隻貓，分別代表我隻狗Lucky同我隻貓Mike mike。」Edmond 追問有無喜歡的卡通人物，Sammi 說：「細個鐘意Little Twin Stars，大個之後無呢啲童真，（鐘意Little Twin Stars真係好女仔），所以鐘意好短時間就唔鐘意。」

大家平時通訊喜歡用send 訊息或直接打電話，而Sammi就有一個特別的習慣，就是鐘意視像通話，Sammi 說：「我鐘意係唔係都用Face time，好多朋友嘅真面目畀我睇晒，好多時啲女仔都無化妝，最近打畀梁漢文老婆，佢就係咁大叫然後用枕頭遮住自己，見到大家嘅真面目我就會好開心。」

Sammi 1988年參加第七屆新秀歌唱大賽入行，短暫在電視圈打滾過，最令人印象深刻的是《大頭綠衣鬥殭屍》，最後一部出演的劇集是《齊天大聖孫悟空》，她在當中客串觀音，之後主力唱歌拍電影，有人問到她會不會再拍電視劇，Sammi說：「我唔排除一切可能性，如果有一個好嘅角色，Why not?!」好期待再見到Sammi 拍劇，不過佢咁忙，機會真係有點細呢！