鄧萃雯接拍ViuTV新劇撼無綫　談善言放心絕無「飛紙仔」發生

談善言（Hedwig）即將為ViuTV新劇擔任主角，問到角色方面，Hedwig回應：「今次自己飾演年輕插畫師，我會介入成為鄧萃雯及陳錦鴻婚姻裡面嘅一個第三者。」Hedwig第一次能夠同鄧萃雯合作十分期待：「我仲未見過佢真人，嚟緊過多一星期就會見面，我聽其他人講佢好Nice，我相信會學到好多嘢。」

Hedwig談及能夠與鄧萃雯合作已經好緊張：「我覺得佢眼神好凌厲，而且佢一行出嚟就有一種氣勢。戲中佢亦係一個女強人，不過我戲中都係好有自我風格嘅人，同佢對戲唔可以怯，所以好緊張。」緊張嘅另一個原因會唔會係因為由細睇鄧萃雯大？Hedwig笑言我哋唔可以講呢啲。

其實有報導指ViuTV打動鄧萃雯接拍呢一套劇原因係劇本齊全，Hedwig亦指其實自己今個星期已經收到劇本：「我慢慢睇緊，集數都好多，寫得比較細緻，所以會慢慢睇。」劇本齊全所以唔會有「飛紙仔」呢類型情況發生？她表示：「唔會啦，我收到已經係一疊劇本，好齊全㗎。」