【三日兩夜】陳婉衡突然激瘦十幾磅：個人問題搞到好大壓力

無綫性感女神陳婉衡不時都會喺IG Post性感泳照為粉絲解解暑，未知係咪操得太勁，身形明顯消瘦唔少，令唔少粉絲擔心。陳婉衡接受《香港01》訪問時，透過電話表示自己的確瘦咗十幾磅。

原本身材已經好Fit的陳婉衡直認前陣子因為太忙而消瘦，佢稱：「因為前幾個月煩緊搬屋，同埋自己個人問題搞到好大壓力，不知不覺就瘦咗十幾磅。我都知咁樣唔健康，因為連肌肉、各樣都瘦晒，所以食返多啲蛋白質。」至於問到如何瘦到肋骨都現形但豐滿上圍不減，陳婉衡笑稱：「都有瘦少少嘅，因為始終都係脂肪，但自己盡量做啲重量同局部的訓練，針對特定部位塑型，咁其他地方結實咗，上面咪唔會細咗囉。」

陳婉衡亦透露自己將會在9月中夥拍小鮮肉伍富橋出發峇里島拍攝旅遊節目《3日2夜》，佢笑言：「伍富橋日日喺IG Post日日食雞胸肉，又狂操肌，搞到我好大壓力。佢咁大隻，我喺隔離都唔想太難睇，唔想同佢相差太大。」陳婉衡又稱將會參與由胡鴻鈞擔正的新劇《救妻同學會》：「早排試咗造型，今次嘅角色好多衫都要露腰，所以導演都有要求話希望見到馬甲線，所以無論運動同飲食方面都嚴咗。