【特技人】譚俊彥「碌落山」爆血縫廿針如常拍攝：自己揀自己承受

譚俊彥主演的《天命》播映後，之後就有《特技人》，譚俊彥在劇中飾演「巔峰特技隊」隊員之一。譚俊彥接任《香港01》訪問時，憶起拍攝時的驚險場面，其中有一場更為他帶來20多針的「戰績」。

譚俊彥講述受傷經過「嗰場係講架車衝落山，即係我要同架車一齊碌落山，有替身同特技人喺度，但係我嗰時成日話：『如果做特技人冇一場係自己（親身）做嘅，咁唔做特技人啦。咁我就遊說個導演話：『如果架車係碌落去先嘅，之後我再碌落去，架車永遠喺我前面，照計都唔會有事。』嗰場劇係講朱朱（朱晨麗）喺架車入面，只係因為入咗戲定係潛意識將架車泊定佢。咁我隻手就擺上啲玻璃度想停低佢，一擺上去就知弊啦，隻手全部流哂血。」意外發生後， 譚俊彥並沒有立即入院，反而應劇組要求，再重新補拍一次才入院治療，最終手部傷口縫了20多針。

不特止，譚俊彥翌日更如常拍攝。「我覺得係𠝹傷手之嘛，縫咗針食咗止疼藥，又冇骨折，戴咗個手套咪繼續開工囉。」對於這個安排，譚俊彥一副理所當然的說：「呢個係工作嚟㗎嘛，係我自己選擇要去做，唔好話演員，係作為一個男人，自己揀嘅嘢自己承受囉。」成件事聽落真係熱血得嚟又好Man吖。