朱晨麗拍新劇演「特技人」：如果刮花臉做有疤嘅角色就唔使化妝

籌備已久的《特技人》舉行了開鏡拜神，劇中演員都出席祈求拍攝順利。而劇中飾演特技人的朱晨麗也以舞獅的大頭佛出場，更加即場由4位猛男抬起，表演一字馬。

劇名話明係《特技人》，就梗係有特技場面啦。主角之一的朱晨麗更是飾演特技人(即是俗稱的替身)。她接受《香港01》訪問時提到，這次拍劇很多危險場面：「我哋呢次係演專業特技人，將幕後嘅事拍出嚟，全部都係危險嘢。為咗呢次拍劇，我哋全部都有操fit。(點操fit ?) 我有舉鐵。其實冇返咁上下體能都好難捱到，仲有順便減下肥。因為另一套劇《棟仁的時光》都需要瘦，布比較少啲。」(有冇危險鏡頭?) 我自己淨係睇咗幾場戲，未知太多。不過我有問過監制，佢話：咪指意乜都冇，乜都有，你諗到嘅都有，越危險越有。」

咦，拍咁多危險嘢咪有機會受傷刮花塊臉囉? 但係朱晨麗又藝高人膽大話唔驚喎：「冇得驚㗎，大膽啲做，一驚出嚟效男唔好，你驚工作人員仲驚。」之後朱晨麗更說笑道：「如果真係刮花臉咁唔好彩，都係一個經驗嚟，唯有下次小心啲。又如果真係花咗，搵我做有疤痕嘅角色咪唔使化妝囉。」(咁你有冇買重保險?)「都有嘅，我相信公司有保護我哋安全。」
睇嚟朱晨麗這次瞓身演出，刮花臉都唔驚喎。