【鄺潔楹Judy‧專訪】少劇拍原來受身高影響 工作狂3個月無放假
鄺潔楹Judy給人的感覺一直是可愛型，雖然細細粒粒，但仍然被網民封為「仙氣女神」，可見她受喜愛的程度相當之高。自2016年加入TVB後，Judy的事業生涯走得相當順利，一個在美國讀完西雅圖大學商業經濟學學士學位的女孩子，搖身一變成為新聞女主播，很快又被製作人留意，邀請拍攝旅遊節目《3日2夜》，以比堅尼出鏡的她立即一夜成名。
《3日2夜》後，連帶同戲劇組也向Judy招手，在《愛·回家之開心速遞》中飾演Venus，又是得到觀眾極大回響。現在的Judy，化身為綜藝主持常客，加入《學是學非》，還有在其他劇集中露面演出，TVB可謂鍚她鍚到燶。不過Judy並不覺得自己是被特別寵幸的一個，她說：「其實我自己唔覺被力捧，至於多機會，我都好珍惜同感恩。一路以來我都同唔少監製、編劇同埋PA傾偈，佢哋都會話我幾好彩，由娛樂新聞台主播去到做《3日2日》，之後又有唔同嘅節目組搵我拍嘢，我自己係好開心。但有時有一刻都會有少少累，因為我喺娛樂新聞台係做full time，一個月需要20日去履行，咁如果我有時多劇或者節目，就可能3個月都無1日假。但係我自己覺得好值得，機會唔係成日有，就算無假，開心都係大過辛苦。」
雖然口說不辛苦，但卻因為一件事令到Judy眼濕濕（睇片就知）。「有一次我爸爸真係出到聲講，話我連陪佢睇一套戲嘅時間都無，真係有少少心噏噏。做嘢辛苦我唔介意，但如果連陪屋企人睇場戲嘅時間都無，嗰一吓係會有少少唔開心。入行前每個星期日都係family day，以前爸爸睇跑馬，我都會喺佢身邊陪佢，而家真係好耐無做呢啲事，所以佢上次無喇喇講起，我真係成個喊晒。我真係覺得對佢哋唔住，不過而家有啲節目出街，佢哋都好恩惠，有少少嘅成績做到俾佢哋睇，我都幾開心。」作為一個藝人，尤其是TVB藝人，休息時間少，工作時間長，捱壞身體的例子常常聽到，家人沒時間陪是常識，好在能夠得到家人們的體諒，也算是苦中一點甜。
加入TVB兩年有多，雖然出鏡率未算好高，但一個月下來總會在電視見到Judy幾次。除了TVB藝人之外，她還是一位模特兒公司的藝人，其實Judy會否想過全身投入TVB博取更多的出鏡機會呢？她說：「未諗到咁遠係真嘅，但如果有呢個機會都考慮吓，始終TVB一路以嚟都俾好多機會我，但係都要睇之後嘅發展。」以她的人氣，這兩年多只輕微客串過兩套劇集，除了《愛·回家之開心速遞》外，還有《危城First Lady》中飾演陳煒的年輕版，不過拍得少並不是Judy不想拍，而是有原因：「其實拍劇我係有啲輸蝕，因為始終身型比較細粒，同埋你知TVB嘅男藝人比較高大，甚至女藝人普遍嚟講都唔係太矮，但我自己真係比較細粒。好多男藝人都成米八高，無理由要人哋長期就我個高度，好辛苦㗎嘛。所以我覺得可能外型上唔係好夾到，當然有機會我會去試，我係一個幾隨如而安嘅人，我好少可會推job。」
想睇更多鄺潔楹Judy靚相？即Click下面喇！
想睇更多藝人專訪？即Click下面喇！