【BB來了‧專訪】姚嘉妮長洲妹唔恨入豪門 嫁林祖輝只因一個原因
劇集《BB來了》踏入結局篇，劇中姚嘉妮飾演「十三點陪月」許朗，有一個複雜的過去：年少離家出走及多次墮胎。而現實中的姚嘉妮有一個美好的家庭，一個全心全意愛護自己的老公林祖輝，與他育有兩個孩子，一子一女，幸福美滿。
欣賞林祖輝成熟踏實
嘉妮19歲參加亞洲小姐後獲得當屆季軍，因而認識同為亞視藝人的林祖輝。嘉妮當年也算是當家花旦，美貌與身材並重，應該追求者眾，但她也沒有挑富商或當紅男星，偏偏選擇了作風相對低調的林祖輝，她說：「同佢相處得好舒服，其實我係一個好怕無安全感嘅人，尤其細個嗰時，佢畀人嘅感覺好穩重，唔會花花弗弗，同埋佢年紀比我大一截，嗰時我好細個，只係得十幾歲，如果係年紀相若嘅男仔，都未成熟，當時嘅林祖輝，三十出頭，喺我心目中，已經係一個成熟嘅男士。」
雖然林祖輝在演藝路上沒有大紅大紫，但絕對有內涵，而他不僅有學識，對朋友更是兩脇插刀。林祖輝中學就讀傳統名校九龍華仁書院，畢業於香港大學文學院，主修經濟及哲學，難怪與同樣哲學畢業生的黃子華如此投契。子華在最近的棟篤笑《金盆𠺘口》的其中一場公開多謝林祖輝，在他還沒發跡前，多次仗義相助，二人在後台相擁爆喊，非常感人。
嘉妮大讚老公林祖輝人品好：「佢係一個好忠直嘅人，『擔屎唔偷食』，唔會去呃人，佢唔會有好多朋友，但都係一啲關係好長久嘅朋友，例如子華，佢哋依家唔係成日見，但男人就係咁，佢哋唔使成日見，一見面又唔使講好多嘢，男人嘅相處方式好奇怪，我都估唔到子華係咁嘅反應，因為佢哋平時都好Cool。」
林祖輝成熟穩重，難怪可以吸引嘉妮，兩人拍拖七年後，結束愛情長跑，於2006年拉埋天窗，嘉妮說當時覺得是一個Right Timing (適當時機)：「嗰時我想生BB，所以決定結婚。」
難忘初為人母感受：只想全心保護佢
嘉妮在劇中的角色因為遇人不淑而多次墮胎，但她本性喜愛小孩，所以選擇做陪月，同時又助養多名小孩來贖罪，現實中嘉妮有兩個孩子，回想當天初為人母，嘉妮說自己的緊張情況，正如劇中所描述的一樣，因此她份外覺得有共鳴：「你唔好以為誇張，其實好寫實，好貼地，好有共鳴。你會將所有時間放晒佢哋身上，呢個可能真係母性，第一胎真係好緊張，你好唔想離開佢哋，直頭唔想做嘢，只係想全心湊佢哋，第一次出街食飯，當時未有智能手機，我成餐飯開住BB張相望住嚟食，我交畀媽咪幫我湊一陣，我未出到街口已經打電話晤阿媽：『BB點呀?』真係會好緊張，無時無刻都會掛住佢哋。」
直到孩子們返全日制學校，嘉妮笑說當時真係開香檳慶祝，她說：「真係要自己慢慢學識去放手，搵返自己嘅生活，去做運動，搵返自己嘅社交，去工作，平衡返會好啲。」
【BB來了】39歲姚嘉妮大騷長腿 Keep住手腳纖幼靠呢幾種運動
自言性格似許朗：嘻嘻哈哈面對人生
《B》劇中的朗朗大癲大肺、直腸直肚，經常去笑遮掩傷心的過去，嘉妮坦言真實的她跟朗朗性格相像，她說：「其實都似㗎，我都係鐘意嘻嘻哈哈嗰啲人，朗朗嘅角色係遇到煩惱，就唔諗住，嘻嘻哈哈咗先算，依家嘅我，人生閱歷多咗，遇到難題都係嘻嘻哈哈咗先，唔好太執著，開心咗先算啦，既然執著係唔開心，不如開心咗先算，件事過咗去就會過。我又覺得許朗嘻皮笑臉咁面對人生又啱㗎喎，唔通成日愁眉苦臉咩？」
嘉妮說這種性格可能與她來自長洲有關，年少時住在長洲的她，經常穿著拖鞋就出門，周末躺在沙灘上，不習慣把煩惱扛上身，不以物質來換取快樂，她說：「我覺得開心唔係用錢嚟買，所以我從來唔買名牌，因為呢樣嘢買唔到我嘅開心。