岑麗香7月中簽約王祖藍公司 對新工作大賣關子：會留喺香港拍嘢
岑麗香早前宣佈離巢TVB之後，相隔一個月今日（21日）首次公開露面，充足電的香香講起假期直言好充實，除了參加多場婚禮之外，一家人還駕車玩轉半個加拿大：「真係好開心，又可以陪下婆婆同嗲地媽咪啦，同時間去咗法國巴黎拍廣告。」一個假期既可以陪屋企人又可以工作，難怪香香都說這是最佳的vacation。
香香近年來人氣急升，之前宣佈不再同無綫合作之後，令不少fans都大感不捨，大家也很關心她的去向。香香表示7月中已經簽了王祖藍和邵氏合作成立的「手工藝創作」公司，除了繼續拍戲之外，還有一些新的嘗試。講到過檔身價，香香口風好密，完全不透露。祖藍現在主攻內地市場，難道也要北上發展？香香笑謂自己學了多年廣東話，學下普通話都無妨，而且新公司給了她好多時間，令她非常滿意，接下來她也即將開始新工作：「嚟緊呢就會有唔同工作嘅，呢幾個月，咁就會留喺香港嘅，都係拍嘢，咁到時先再宣佈畀大家啦。」
【岑麗香離巢】香香喺TVB嘅5個精彩時刻 《巴不得媽媽》一夜成名
香香今次回加拿大除了探親和旅遊之外，也有和李亞男（Leanne）敘舊。眼見身邊的好姊妹都陸續陀B，不知道香香想不想快點有喜訊呢：「又唔會因為見到人哋有自己想要嘅，咁我又覺得喺自己嘅立場，有都會開心嘅，努力啦！」香香和亞男這般親密，講到和BB上契，她便笑說：「呢個我要等佢自己吩咐喇，即係呢個始終都係祖藍同埋Leanne嘅決定，咁佢如果要嘅話，我哋全部姊妹都當然會肯啦，想啦。」其實大家一直都很關注香香的「造人大計」，她也透露無論是身邊人或者陌生人都給了自己好多建議：「唔識嘅都喺Instagram留言，不過我覺得見到一個人關心下呢，我都好開心嘅，咁我會慢慢儲下呢啲advice嘅，記住嘅。」
早前香香在IG分享的hashtag中寫到「love project」，令大家誤以為她有喜訊宣佈，但原來這個project是她的香水廣告，唔講唔知，其實香香是個不折不扣的香水控：「我鍾意自己身上喺任何地方都會覺得香！」真是人如其名呀。香香表示自己會根據心情去選擇當日噴的香水，所以屋企的香水多到數不清：「我數唔到呀，有時我會搵到一支係新嘅，我係唔記得咗開，因為我鍾意唔同mood就試下唔同味嘅。」香香說有時聞到某一個味道，就會有某一種感覺，所以會喜歡香水。