【BB來了】李佳芯劇中喊唔停　一句激嬲新手媽：你點做人阿媽㗎﹗

TVB劇集《BB來了》引起熱話，未結婚未生小朋友可能覺得Ali李佳芯太誇張，邊有咁多規矩咁多要求架﹗但如果身邊有新手父母，或者湊過小朋友就會知道，劇情真係相當寫實。懷孕十個月再經歷生死咁誕下麟兒，喺荷爾蒙影響下，新手媽媽就好似受傷獅子一樣，對外間所有人事物都好敏感，一不小心就會激嬲新手媽媽﹗以下嚴選媽媽至憎句子，大家睇路啦。

「你點做人阿媽㗎？！」

冇人一出世就識做父母，劇中Ali同黎諾懿親身上陪月堂，又上網又睇書做足功課，不過人算不如天算，Ali去完公司Party忽然下體出血，仲因為胎盤剝落要緊急開刀，做奶奶嘅Madam Lo衝到去醫院完全無慰問，第一句就大鬧：「你點做人阿媽㗎？！我孫女有咩事搵咩賠俾我﹗」Ali一聽到就即時崩潰濠哭，連帶觀眾都嬲到爆呀！

【BB來了】李佳芯盧宛茵展婆媳大戰 新抱奶奶永遠睇對方唔順眼？

「試少少唔怕啦！」

上一代父母無辦法接觸太多資訊，買啲貴價食物俾BB就覺得係對佢地好。劇中Madam Lo專誠買新西蘭貴價蜂蜜，諗住搽喺奶咀上甜甜地，允豬食奶會食得多D：「試少少唔怕啦！」但其實醫學研究發現，蜜糖係敏感高危類，仲可能有肉毒桿菌芽胞，醫生都講明一歲以下BB器官發展未成熟，絕對唔可以試，老人家真係唔好亂試呀。

【BB來了】李佳芯演媽媽情緒起伏好入戲 生仔似走過鬼門關無誇大

「冇人奶咪餵奶粉囉！」

食飯時教小朋友都識講，粒粒皆辛苦，餵母乳嘅媽媽更加明白「滴滴皆辛苦」。劇中Madam Lo以熱水坐熱解凍人奶，實質上超過50度會破壞人奶營養，Madam Lo聽到無營養就倒咗佢，作為人奶媽媽Ali點可能唔嬲到爆﹗仲要聽到奶奶加多句：「冇人奶咪餵奶粉囉，睇你咁瘦啲人奶都唔知夠唔夠營養。」科學啲講句，有胸唔代表多奶，瘦削唔會影響人奶有幾多營養，母乳俾到BB嘅抗體係無可取替㗎！

【BB來了】黎諾懿聞「媽媽谷」色變 李佳芯即Join真係港媽必入？

「以前邊有咁多規矩？」

雖然Ali佢地無請陪月，好在劇中媽媽陳秀珠以前湊開小朋友，基本煮坐月餐幫BB沖涼都應付自如。但上一代奉行天生天養，陳秀珠成日掛喺口邊話：「我以前一個湊6個邊有咁多規矩？」部分軍事化規矩可能係太緊張，但時代進步下，可以做好啲預防好啲，作為媽媽Ali想俾最好嘅成長環境俾BB，實在不為過。

其實新手媽媽真係相當敏感，每對父母都有自己一套湊BB方法，呢啲都係BB父母嘅選擇，旁人都應該尊重。即使覺得佢地有錯，都不妨婉轉少少同佢地講，唔好攪到好似Ali劇中咁坐月日日喊，BB來了應該開開心心先係㗎嘛。