「慳妹」衛詩雅拍通宵唔夠瞓　堅持搭巴士：坐的士三百幾蚊好貴

《笑林寺》一睇個戲名就知係喜劇，又有「方丈」大師劉以達，以及一對孖寶兄弟農夫在新戲演出，甚具娛樂性，衛詩雅在戲中與農夫有感情線，最後同陸泳開花結果。衛詩雅擔心話：「我一知道呢套戲要同農夫拍對手戲，同自己講呢次死緊啦，當我見到佢兩個，未對劇本未做對手戲，已經畀佢地兩個攪到我笑唔停，本身我個角色好cool，到時埋位拍攝我都唔知點算好，佢地兩個講到明，到時唔會跟劇本做，如果係咁樣做，我咪接唔到囉，呢次真係睇到時佢地兩個點樣整蠱我，真係有啲擔心。」

衛詩雅出名「慳妹」，曾經有段長時間沒有戲拍，試過零收入所以學會節儉。「雖然近呢幾年多咗工作，多咗收入，但我從來冇改變過，一樣搭巴士，前幾日拍通宵戲，冇瞓過覺，返屋企沖個涼，一樣咁堅持搭巴士，跟住出門口，驚過時間，跑住出去，上到巴士，可能唔夠訓，個人暈暈地，個一刻真有啲驚。」衛詩雅被問到當刻乘坐的士需要多少車費？「好貴，需要3百幾蚊，距離我屋企好遠，冇咁嘅必要，我都唔會搭的士，自己雖然好攰，叫我訓多一個鐘，就冇咗差不多四百蚊，我唔捨得，因為好多人一日嘅工資都冇四百蚊，所以對我來講係好多。」大家聽到詩雅咁講，相信係好多男人心目中理想情人。