【某日某月】陳茵媺復出轉攻拍戲指時間易就：較適合我生活！

陳茵媺（Aimee）周三晚（5月30日）出席她有份演出的《某日某月》首映禮，老公陳豪亦有現身支持。

Aimee今次在戲中扮演老師，外表老土，無論化妝和衣着都跟平日風格大相徑庭，但她坦言自己沒有不習慣，反而好開心：「其實我最想就係（觀眾）唔係好認得我，會有啲新鮮感畀觀眾，同埋我自己都可以比較易啲入戲，好玩啲。」

Aimee直言在拍攝期間，為了更加貼近老師的角色，都有刻意去改變一些生活中的習慣：「我平時講嘢係好多小動作，成日郁嚟郁去，但其實鲁老師（角色名）講嘢係淡定啲、慢啲，同埋佢啲小動作好微細嘅，所以喺嗰段時間，我就要調校我啲聲線，同埋我講嘢嘅速度唔好咁快囉。」

Aimee今次扮演老師花了很多功夫，一點都不簡單，要在溫柔和嚴厲之間找到平衡點，她笑自己好似媽媽一樣：「點樣去教啲小朋友嘅時候又唔可以太惡喇，但係呢又要firm呀，又會令我諗起以前做老師嘅時刻囉。」雖然戲中的Aimee就好溫柔，不過在仔女面前，她承認自己是位嚴母：「如果太溫柔其實教唔到小朋友，咁但係如果太嚴格呢，其實佢哋都唔會聽你嘅說話啦，咁所以我就盡量搵個中間囉，不過我覺得近排我都係比較嚴格啲嗰個。」

Aimee出道以來都以拍劇為主，鮮有在大銀幕上演出，不過她就覺拍劇同拍戲並無分別，最緊要是入戲和貼近角色。

Aimee稱拍電影感覺好舒服，還大讚導演劉偉恒給予演員好多自由。Aimee透露現在暫時會以拍電影為主，有幾個不同的劇本都在商討中，雖然自己都好懷念拍劇的日子，但因為要照顧小朋友的關係，Aimee不可以長時間離開屋企：「電影嘅時間比較適合我而家生活上嘅environment，我啲時間比較易就啲，因為電影時間比較短啲。咁電視劇唔係話唔拍嘅，只不過話係有啲難就，三、四個月離開屋企我唔可以。」一切以仔女為先的Aimee，在工作時間上會盡量同阿Mo配合，希望兩人中至少有一個可以在屋企照顧小朋友。