【美女廚房】蕭正楠錯怪黃翠如煮飯差　有港姐仲離譜：喺廚房癲咗

《美女廚房》新一輯將於6月2日首播，係咪又興奮又期待呢？今次節目玩法與以往舊幾輯亦都差不多，一樣有女藝人上陣炮製美食。不過不同的是，男主持方面就換了全新班底，改由林盛斌（Bob）、蕭正楠以及張振朗上場做「白老鼠」試食。今日《美女廚房》美女學徒首登場的記者會上，蕭正楠以及張振朗接受了《香港01》訪問。2位談到試食環節時，都表示「一額汗」，蕭正楠更說：「分生熟嗰下真係大獲，要我哋食生嘢呢，真係攞我哋條命。」

想睇18位美女學徒的話，可以click呢度：
【美女廚房】一文睇晒5位素人美女 打碟DJ洛兒隨時係全場最靚

蕭正楠、張振朗續說：「蕭正楠：我寧願啲嘢食燶嘅就唔好生囉。張振朗：唔好跣我哋囉，燶燶哋可以倒咗吖嘛，生生哋食落去唔知生熟㗎嘛。（寧願食燶到成舊炭咁定全生嘅？）蕭正楠、張振朗：食燶嘢！燶嘢都係致癌嗜，哈哈哈。燶嘅可以用筷子夾走吖嘛，起碼熟咗先會燶㗎嘛。」

蕭正楠講到咁怕食生嘢，如果係女朋友黃翠如煮生嘢俾佢食，又會點呢？蕭正楠說：「做完呢個節目，我發覺我錯怪咗佢，我鄭重同你講對唔住，原來你煮嘢食係唔錯嘅。我都冇諗過咁多女藝人直情係離諳㗎，直頭係亂嚟。你見佢平時拍戲好優雅好靚，佢喺個廚房係癲咗。（係邊個？）唔講得㗎，要出咗街先知。（形容下？）選過港姐，合作過嘅。（最近幾屆？）係最近幾屆嘅。」拍過劇，又同蕭正楠合作過，還要是最近幾屆的香港小姐。到底係黃心穎、朱晨麗、陳凱琳定劉佩玥呢？