【美女廚房】麥明詩揸矮瓜自稱「一定好爽」　FYY神回獲網民大讚

馮盈盈 (Crystal) 同麥明詩 (Louisa) 一向好玩得又好敢言，甚至被網民形容為歷來最貼地，最率真的港姐冠軍，完全唔會因為要顧及港姐冠軍的形象而失去了自我。她們一起主持的無綫節目《後生仔傾吓偈》又不時會爆出金句，總之兩個走埋一齊就成日都有火花啦。該節目最近一集集講初戀回憶，Crystal話有第一次同初戀男友拖手時，她被對方搞到濕晒，她說：「濕晒喇，連地下都濕埋喇。」不過大家唔好心邪，她只是因為當晚成晚都好緊張，手汗滴到落地下都係啫。Louisa仲要加多句：「總之我聽到佢係咁濕啦。」

咪以為她們主持後生仔先咁搞笑，日前Louisa同Crystal又隔空合體講有味笑話搞Gag喇。事緣Louisa為TVB新一輯的《美女廚房》拍攝宣傳片，她於instagram上載了一張與陳凱琳、蔡思貝的合照，亮點是相中的Louisa雙手拎住一隻茄子，仲留言表示：「美女廚房，一定好爽」，點知Crystal竟然留言回應Louisa話：「一定好爽」仲要加隻茄子同一個奸笑emoji，好鬼抵死，相信畫公仔唔使畫出腸，大家都get到Crystal的意思，而Louisa就以幾個奸笑樣來回覆Crystal。粉絲同網民都紛紛留言話好好笑，又話她們夠晒貼地。

為了唔好令大家誤會，當然要搵返Crystal同Louisa來講解下啦，究竟她們是否講緊咸濕笑話？Louisa表示：「我哋兩個不嬲係咁，當日咁啱有隻矮瓜喺度，咁我就手咪拎起囉，爽係因為有靚女又有美食吖嘛。」而Crystal就話：「意淫與否，從來都係取決於你點解讀，其實我哋嘅說話字面上無咩意思，係你哋唔知諗咗去邊啫。」