【哈里王子大婚】Meghan哈里善心爆棚 借婚禮鮮花與世人分享幸福
撰文：洪曉璇
出版：更新：
英國哈里王子與梅根（Meghan Markle）嘅世紀婚禮受全球矚目，雖然早已圓滿落幕，對於婚禮每個細節，無論設計理念、價值、寓意等，大家都仍在繼續熱烈討論。婚禮上用上好多哈里王子媽媽戴安娜王妃喜歡嘅白玫瑰佈置，大量鮮花以及梅根手上嘅花球原來並無被棄置。
+3
一對新人出名熱心公益，除咗有200名來自各大慈善機構代表出席婚禮，哈里王子亦邀請一名14年前於非洲賴索托（Lesotho）認識嘅孤兒Mutsu Potsane參與婚禮，而英國王室官方網站嘅薩塞克斯公爵夫人（Duchess of Sussex）專頁，亦以大篇幅介紹梅根參與過嘅公益活動。除此以外，就連婚禮嘅佈置物資，佢哋都用作慈善用途。
一間喺倫敦嘅臨終關懷醫院，於上載一張老太太捧住大束鮮花笑得好燦爛嘅相，留言寫上：「今日我們收到很特別的禮物，病人們手中的鮮花來自皇室婚禮，非常感謝哈里王子、梅根以及花藝師Philippa Craddock，令醫院瀰漫香氣。」原來婚禮過後，除咗部分花拎返皇宮種植以外，其餘鮮花都被送往不同嘅醫院及收容所，為病人們增添溫暖。
至於梅根當日嘅花球，用上戴妃生前最愛嘅Forget me not以及皇室新娘必備嘅香桃木（Myrtle），相當搶眼。婚禮後並無大家常見嘅拋花球環節，原來花球留低喺西敏寺嘅英軍烈士碑上。根據英國皇室官方Twitter所講，呢個傳統已經有近百年歷史，當年伊莉莎白女王大婚當日，進入西敏寺時將花球放喺英軍烈士碑上，以作紀念1915年於戰役中犧牲嘅家人Fergus，以及向第一次世界大戰中數百萬遇難和傷亡嘅人致敬。自此成為另一皇室新娘傳統，2011年威廉王子同凱特結婚，當時嘅花球亦有跟傳統，留喺英軍烈士碑上。