【哈里王子大婚】新娘花球細節顯心思　一支香桃木跟足王室傳統

呢個周末令全球聚焦嘅盛事，莫過於英國哈里王子與美國影星梅根（Meghan Markle）於溫莎堡聖喬治禮拜堂（St George's Chapel）舉行嘅世紀婚禮。婚禮每個細節包括婚紗、頭紗、花車、婚戒一一被外界審視，而梅根手上嘅花球，除咗用上同宋慧喬一樣嘅鈴蘭以外，原來仲大有來頭。

著名花藝師Philippa Craddock設計花球

婚禮上新娘除咗撓住老公，一對手最常掂住嘅就係花球，哈里王子同梅根嘅婚禮雖然有唔少癲覆皇室傳統嘅事物，不過喺花球呢一項上就跟足傳統。梅根嘅花球簡約而有層次感，由倫敦著名花藝師Philippa Craddock設計，以淺色真絲絲帶綁成，用上宋慧喬花球都有用嘅鈴蘭花、豌豆花、茉莉花等，仲有戴安娜王妃生前最愛嘅Forget me nots，除咗用作悼念戴妃，仲有一種花材係皇室婚禮必備。

喺英國皇室官方Twitter中講到，原來好多皇室新娘都選擇喺花球中，加入一枝代表愛情嘅香桃木（Myrtle），呢個傳統可以追溯至維多利亞女王，佢以一枝 香桃木為自己嘅花球作點綴，並於婚禮後將阿爾伯特親王祖母，送给俾佢嘅桃金娘灌木枝，種喺懷特島上奧斯本宮宅邸花園，至今已經170年歷史。從英女皇、戴安娜王妃到劍橋公爵夫人凱特，佢地嘅花球都跟足傳統加入一枝香桃木，梅根亦唔例外。