謝霆鋒稱唔入行會向電競發展　狄波拉：早知唔阻你打機啦

潮流興集體回憶，八九十年代聽開嘅歌、追捧嘅偶像，甚至那些年嘅飲品雪糕推出復刻包裝，一樣大受歡迎。最近有網友喺討論區留言，想當年無手機嘅年代放學趕返屋企打機，最怕俾阿媽捉到嚇到個心離一離。以前打機就話無出色，但今時今日「電競」已經發展成體育競技，講起打機，圈中有唔少藝人都係「機友」有啲仲組電競隊比賽添。

日前，謝霆鋒以代言人身份，到西安出席手機遊戲宣傳活動，霆鋒話對上一次去西安，已經係04年嘅事。活動上，大會主持問霆鋒有冇玩過代言嘅遊戲，佢就話最鍾意就係玩RPG Game，「我用好多時間去打機㗎！我記得同過我阿媽（狄波拉）講，如果我唔係入咗行，我係會向電競方面發展。」佢仲話以前打機嘅年代唔似得而家，「而家打機係有好多途徑知道攻略、關於遊戲嘅資訊，我以前打嘅時候好『寂寞』。」而家打機（電競）已經發展成為體育競技，隨之衍生的電競產業更達億億聲，霆鋒笑說，「我阿媽同我講：『早知遊戲市場咁大，當初我就唔阻你啦。』」