謝霆鋒試超蓮牛肉麵　留低兩隻字驚天食評：好味

賭王三房千金何超蓮，早前投資過百萬進軍飲食界，開了一間台灣牛肉麵店，仲話事事親力親為，目標係有日可以上市。不過在這個崇高理想之前，卻遇到一位明星級大廚去店舖試味，他就是Chef Lemon謝霆鋒，究竟他試食之後，又會給超蓮什麼獨特意見呢？睇埋落去就知。

近日霆鋒分享了一條煮麵的短片，又猛火煲水落麵，之後又加入凍水，仲要夾起條麵試下麵質口感，煮麵都相當講究，有晒獨門秘技。大師級的霆鋒，日前就去了超蓮間牛肉麵店開餐，先後試過牛肉麵和豬耳朵，還在網上留言評價，咁又識得煮，又識得食的霆鋒，給了超蓮什麼爆勁意見呢？答案就係兩個字「好味」，可說是食評最高境界。

雖然霆鋒嘅意見，同阿媽係女人無乜分別，但之後他都Post了幾張開餐相上網，叫做幫好友超蓮做宣傳，之後仲Tag埋超蓮。超蓮對霆鋒亦表示感激，留言「感謝謝大廚的點評，我們會努力做得更好」，還叫來香港的朋友去幫襯她的麵店，其實超蓮咁多明星朋友，叫他們輪流宣傳，肯定可以客似雲來。