【排舞天王】海城夜總會舞王 綠葉王李鴻杰：曾經都叱吒過
李鴻杰將自己的前半生交給了跳舞，全因興趣使然，而編舞則是一個樂趣，兩個趣連起來，成為了他半生的歷史。作為一個排舞師，杰哥形容這是一個主動的模式，整個節目由他自己負責，成個場話晒事。但演員就只是一個角色，好被動，兩者各有特色，但卻劃分了他的一生人，他將前半生後的時間大部分奉獻了給演戲。
對於跳舞，杰哥並不是什麼名校出身，他在接受《香港01》時表示：「跳舞喺我哋嗰個年代無咁多學校，我係跟師傅，入TVB之前有啲跳中國舞嘅夜總會，我係做漢宮同珠城。我79年就離開TVB，嗰時香港好蓬勃嘅，有海城酒樓，有海洋酒樓，海城夜總會嗰時好多明星登台，曾經都叱吒過，我喺嗰度佔嘅比重都好大，舞蹈成就叫有一啲喇。同時我亦都有幫亞視排舞，仲有夜總會排舞呢，嗰時好多歌星都喺出面走埠，都好多人搵我排舞。之後有段時間，新加坡廣電局邀請過我去幫佢哋排舞，都做咗幾年先回流香港，就再入返TVB。」
不再排舞，是因為長江後浪推前浪，他說：「我返嚟係因為時代有唔同，舞蹈界係轉人好快，我嗰陣同我一齊合作嘅後生仔都升晒做排舞師，加上自己年紀又大喇，又有機會做演員，其實做咗演員都有編舞，不過少咗好多。我亦都會參與一啲舞蹈總會嘅表演，不過可能小圈子，公眾就無乜留意。」
作為一個舞者，那個年代好吃香，尤其是杰哥已經有一定的名氣，很多明星都會找他合作。「其實我都幾雜錦，我學係中國舞，但入TVB要跳現代舞，樣樣都識少少。排舞都有層次，幾個人係明星後面係一種，大型好似港姐嗰類又係一種，香港小姐我有份跳就無份排，澳門小姐就有。7幾年嗰時我係移民前幫亞視係排晒所有舞，你當係舞蹈總監，基本上亞洲小姐都係我同一位外籍老師排晒，電視先生都係，不過得兩屆。總有啲歌唱比賽、台慶都係，所以我同亞視嘅關係都幾好。」一生人的夢想都齊集了，杰哥可以說是無憾，希望將來可以在TVB再看到他，最好是一些關於當年跳舞的題材。