【飛虎之潛行極戰】何佩瑜拍劇初體驗　望再接再厲與吳卓羲續前緣

因為樂易玲小姐，何佩瑜（Jeana）獻出了自己的「第一次」──拍攝電視劇集。對此，Jeana相當興奮地說：「做藝人、演員都好想可以多元發展，今次我真係好多謝樂小姐搵我拍呢個角色，我真係未試過拍電視劇。」

問到《飛虎之潛行極戰》之後會否想多些機會繼續現身公仔箱，她毫不掩飾坦言：「絕對想啦，樂小姐快啲搵我呀！」還補充：「因為我拍完《飛虎之潛行極戰》之後，覺得電視劇有足夠時間、情節去建立個角色性格，但電影就唔同，要喺個幾鐘內交代好多嘢，比較濃縮囉，所以電視劇俾人感覺個角色會入心啲。」

劇中Jeana與吳卓羲及梁烈唯有感情戲。（官圖）

電視劇界別有很多當紅小生，要是Jeana想多參與拍攝電視劇，未知她較心儀哪一位呢？馬國明、陳展鵬、陳豪還是袁偉豪？她卻繼續選擇在《飛虎之潛行極戰》中有感情對手戲的吳卓羲再續前緣：「因為個個都話我同佢嘅感情線未睇得過癮。其實唯唯都想嘅，仲有三哥、岱融哥，佢哋實在太型太好戲喇。」到最後原來三心兩意。

Jeana挑選男對手雖心猿意馬，但對古裝戲卻一心一意、情有所鍾：「因為我未試過古裝，最多都係民初。同埋我覺得女仔著古裝裙，再配埋妝容、頭飾會好靚，最好就著住古裝騎住馬，成個感覺好飄逸。我諗呢個畫面係好多女仔嘅夢想。」

靚，是要付出代價的，當大熱天時穿古裝彷如裹蒸粽時就知味道。但Jeana為靚不惜一切：「唔緊要，我寒底，幾熱都唔怕。」

為一嘗拍古裝的滋味，Jeana連「我寒底幾熱都唔怕」都講得出。（黃國立攝）